Yqpaldastyq jalǵasady

Máskeý qalasynda ál-Farabı atyn­daǵy Qazaq ulttyq ýnıversıteti (QazUÝ) men M.V.Lomonosov atyndaǵy Máskeý Memlekettik ýnıversıteti (MMÝ) ara­synda Yntymaqtastyq týraly keli­simge qol qoıý rásimi ótti, dep habarlady Qazaqstannyń Reseıdegi elshiliginiń bas­pasóz qyzmeti. Qujat ýnıversıtetter rektorlary Ǵalym­qaıyr Mutanov pen Vıktor Sadovnıchııdiń qoldarymen bekitildi. Al kelisim stýdentter men muǵalimder arasynda almasý, ózara ǵylymı taǵylymdamalar ótkizý, birlesken bilim berý baǵdarlamalaryn daıyndaý jáne olardy iske asyrý, akademııalyq kezdesýlerdi, sımpozıýmdar men ǵylymı mektepterdi, birlesken zertteý jumystaryn uıymdastyrý jáne t.b. sharalardy qamtıdy. – Qazaqstandyq áriptesterimizben yntymaq­tastyǵymyz onjyldyqtarǵa sozylyp, burynnan jalǵasyp keledi, – dedi V.Sadovnıchıı. – Ara­myzdaǵy baılanystarymyz aıtarlyqtaı, biz dos jáne seriktespiz. QazUÝ túlekteri MMÝ aspırantýrasynda oqyp jáne, kerisinshe, MMÝ túlekteri QazUÝ aspırantýrasynda óz oqýlaryn jalǵastyrýda. Jańa kelisim bizdiń qarym-qatynasymyzǵa mańyzdy serpin beretinine senimdimin. О́z kezegine Ǵ.Mutanov tańdaýly 300 QS (Ulybrıtanııa) áıgili halyqaralyq reıtıngine TMD joǵary bilim oryndarynyń úsheýi ǵana kirgenin eske salyp ótti: MMÝ, SpbMÝ jáne QazUÝ. – Kelisim Eýrazııalyq ekonomıkalyq odaq­tyń sheńberinde paıda bolǵan kóptegen ǵylymı máselelerdi birigip sheshýge múmkindik beredi, – dedi QazUÝ rektory. MÁSKEÝ.