Júzege asqan iri joba

Máskeýdiń asa iri azyq-túlik ortalyǵynda «Ońtústik Qazaqstan» saýda-kórme zaly ashyldy 25 qańtarda Máskeý qalasyndaǵy asa iri «Fýd sıtı» bólshektik-kóterme saýda azyq-túlik ortalyǵynda «Oń­tústik Qazaqstan» saýda-kórme zaly ashyldy. Jobanyń uıym­das­tyrýshysy Qazaqstannyń Saýda ókildigi men Reseıdegi elshiliginiń qoldaýymen «KazFood» brendi aıasynda «Prızma grýpp» kompanııasy boldy. Saýda-kórme zalynyń saltanatty ashylý rásimine Ońtústik Qazaqstan oblysy ákiminiń orynbasary Saparbek Tuıaqbaev, Qazaqstannyń Reseıdegi saýda ókiliniń orynbasary Gúljan Bodyqova, «Fýd sıtı» agroklasteriniń bas dırektory Omar Abramov, Reseı bıznesi men Qazaqstan kásiporyndarynyń ókilderi qatysty. Saltanat kezinde S.Tuıaqbaev Qazaq­stannyń azyq-túlik taýarlarynyń Reseı rynoktaryna eksportyn keńeıtý qajettigin aıtyp ótti. Sheneýnik oblys ákimdiginiń qazaqstandyq taýar óndi­rýshilerge Qazaqstannyń Reseıdegi Saýda ókildigi men Elshiligine ózara is-qımyl tanytýda kómek kórsetýdi jalǵastyrýǵa daıyn ekenin atap kórsetti. Ońtústik Qazaqstan oblysynyń taýar óndirýshileri reseılik tutynýshylarǵa azyq-túlik ónimderiniń 20-dan astam túrin usyndy jáne taıaý bolashaqta ónim túrlerin 100-ge jetkizýdi josparlap otyr. Ashylý rásiminde reseılikterge et ónimderi men delıkatester, jemis-kókónis konservileri men balyq delıkatesteri, sút ónimderi, kondıter buıymdary, bakaleıa taýarlary, shaı, bal ónimderi, t.b. usynyldy. Atalǵan joba qazaqstandyq ónim óndirýshiler men dıstrıbıýtorlarǵa jár­dem kórsetý, Reseı aýmaǵynda qazaqstandyq eksporttyń geografııasy men kólemin keńeıtý maqsatynda júzege asyryldy, dep habarlady Qazaqstannyń Reseıdegi elshiliginiń baspasóz qyzmeti.