Ulybrıtanııada 100 jyl buryn jazylǵan ertegi tabyldy

ASTANA. 27 qańtar. Ulybrıtanııanyń London qalasynda Vıktorııa men Alberttiń murajaıynan aǵylshyn balalar jazýshysy Beatrıs Potterdiń buryn belgisiz bolyp kelgen «Etik kıgen marǵaý týraly ertegisi» (The Tale of Kitty-in-Boots) tabyldy. Bul týraly TASS aqparat agenttigine silteme jasaǵan egemen.kz tilshisi habarlady. Eki túrli ómir ıesi – qara marǵaýdyń basynan keshken oqıǵalary týraly shyǵarma alǵash ret qyrkúıek aıynda jaryq kóretini belgili boldy. Jazýshynyń muraǵattarda saqtalǵan hattaryna qaraǵanda ertegi aıaqtalmaǵan, degenmen onyń jumystarynda I dúnıejúzilik soǵystyń bastalýy, turmysqa shyǵýy jáne densaýlyǵyna baılanysty sebeptermen úzilister bolsa kerek. Sonymen qatar, Penguin Random House Children's (Pengýın rendom haýs chıldrenz) baspa úıiniń ókili Djo Henks ertegini «Beatrıs Potterdiń úzdik shyǵarmasy» dep esepteıdi. «Onda, basqa ertegilerinen alynǵan aıqyn zulymdyq ıeleri men jaǵymdy keıipkerler kezdesedi. Bárinen tamashasy bizdiń janymyzǵa jaqyn sotqar Pıter paıda bolady, tek ol eresek tartqan jáne jaıbasarlaý», – deıdi ol. 1914 jyly mektep oqýshysynyń úsh dápterine jazylǵan shyǵarma buryn Londonda eshqashan redaksııalanyp, bolmasa bezendirilmegen eken. Endi sonyń sáti kelgen sekildi. Aǵylshyn jazýshysy Roald Daldyń shyǵarmasyna arnalǵan jumysy boıynsha tanymal bolǵan norveg tekti Kventın Bleıktiń bezendirýimen jaryq kóretin bolady. Sýretshi ózine buıyrǵan jańa jumysty úlken sáttilik retinde baǵalaıtynyn aıtyp otyr. «Ertegi maǵan qatty unady jáne ol osy ýaqytqa deıin meni ǵana tosyp otyrǵan sekildi sezimde boldym», – dep aǵynan jaryldy. Aıan Ábdýálı. Derek: TASS. Sýret: spletnik.ru.