Shyǵys Qazaqstanda bolǵan jarylystyń sebebi anyqtaldy

О́SKEMEN. 27 qańtar. Shyǵys Qazaqstan oblysy Ulan aýdanynda bolǵan iri jarylystyń sebepteri anyqtaldy. Bul týraly Shyǵys Qazaqstan oblysynyń aqparattyq ortalyǵyna silteme jasaǵan egemen.kz tilshisi habarlady. Jergilikti halyqty qobaljytqan oqıǵaǵa baılanysty komıssııa qurylyp, aýdan ortalyǵy Qasym Qaısenov kentiniń turǵyndaryna keltirilgen shyǵyn kólemi zertteldi. О́nerkásiptik qaýipsizdikti qamtamasyz etý erejesin buzǵan kináliler anyqtalyp, jaýapkershilikke tartyldy. Osydan biraz ýaqyt buryn aýdan ákiminiń orynbasary Dýlat Qajanovtyń tóraǵalyǵymen qurylǵan arnaıy komıssııa Qaısenov kentine jaqyn jerde bolǵan dúmpýdiń sebepterin anyqtaýǵa kirisken bolatyn. Júrgizilgen zertteýdiń qortyndylaryn komıssııa músheleri oblystyq aqparattyq ortalyqta resmı túrde jarııa etti. Ulan aýdanynyń prokýrory Baqytjan Mámbetovtiń aıtýynsha, «Insem» jaýapkershiligi shekteýli seriktestik Qaraózek kenishinde jer betindegi jarylys jumystaryn júrgizgen. Qaýipti óndiris nysandaryna arnalǵan ónerkásiptik qaýipsizdikti qamtamasyz etý erejeleri basshylyqqa alynbaǵan. Sondaı-aq, merdiger uıym jaqyn mańdaǵy eldi-mekenderdiń turǵyndaryn saqtandyrmaǵan, aýa-raıyn esepke almaǵan jáne jarylys jumystaryn júrgizýge qatysty ruqsat alý erejesin buzǵan. Júrgizilgen jumystardyń nátıjesinde, tapsyrys berýshi «Insem» jaýapkershiligi shekteýli seriktestik pen «Vostok-Ýnıversal» jaýapkershiligi shekteýli seriktestik ákimshilik jazaǵa tartyldy. Turǵyndarǵa kelgen shyǵyndy tolyǵymen óteıdi. Dýman Anash. Derek, sýret: Shyǵys Qazaqstan oblysynyń aqparattyq ortalyǵy.