Rıo Olımpıadasynda top jarǵan qazaqstandyqtar syıaqyny jańa baǵammen alady

ASTANA. 27 qańtar. Bıyl ótetin Rıo-de-Janeıro Olımpıadasynda chempıon atanǵan jáne júldege ilikken otandyq sportshylardyń syıaqysy osydan tórt jyl burynǵy London Oıyndaryndaǵy somamen birdeı bolady. Atap aıtqanda, Úkimettiń 2014 jyldyń 19 jeltoqsanyndaǵy №1345 Qaýlysyna saı altyn medal alǵan sportshylarǵa memleket tarapynan 250 myń AQSh dollary beriledi. Sondaı-aq, kúmis medal úshin – 150 myń, al qola júldege 75 myń dollardan taǵaıyndalǵan. Bul týraly Mádenıet jáne sport mınıstrliginiń baspasóz qyzmetine silteme jasaǵan egemen.kz tilshisi habarlady. Sonymen qatar, úzdik altylyqqa engen sportshylar da syıaqydan qur qalmaıdy. Iаǵnı, 4-orynǵa – 30 myń, 5-orynǵa – 10 myń jáne 6-orynǵa 5 myń dollardan beriledi. Odan bólek, sportshylardyń jeke jattyqtyrýshylaryna da osyndaı kólemde syıaqy qarastyrylǵan. Barlyq syıaqy dollardyń qazirgi baǵamy boıynsha teńgemen beriledi. Bul bıylǵy Olımpıadaǵa qatysýshylar syıaqyny tórt jyl burynǵy dodada top jarǵan sportshylardan eki jarym esege kóp alady degen sóz. Dál búgin, ıaǵnı 27 qańtar kúngi Ulttyq banktegi bir dollardyń teńgege shaqqandaǵy baǵasy 380-ge teń. Soǵan oraı, bıyl chempıon atanǵan sańlaq 95 mıllıon teńgeni qaltasyna basady. Al London Olımpıadasy ótken 2012 jyldyń tamyz aıynda bir dollardyń baǵasy 149 teńge bolyp, «altyn» alǵandarǵa 37 mıllıon 250 myń teńgeden berilgen edi. Elaman Qońyr. Derek: Mádenıet jáne sport mınıstrliginiń baspasóz qyzmeti. Sýret: dreamstime.com.