Atyraýda esirtki tasymaldaýshy 11 jylǵa sottaldy

ATYRAÝ. 27 qańtar. Atyraý oblysynyń qylmystyq ister jónindegi mamandandyrylǵan aýdanaralyq soty asa iri mólsherde esirtki zatyn zańsyz saqtap, tasymaldaýshyny 11 jyl merzimge bas bostandyǵynan aıyrdy. Bul týraly Atyraý oblystyq sotynyń baspasóz qyzmetine silteme jasaǵan egemen.kz tilshisi habarlady. Bas bostandyǵynan aıyrylǵan adam Taraz qalasynyń turǵyny bolyp shyqty. Ol óziniń jeke menshigindegi Subaru Forester markaly avtokóligin paıdalanyp, jalpy salmaǵy 15 kıloǵa jýyq marıhýana túrindegi esirtki zatyn Atyraý qalasyna tasymaldaǵan. Biraq ońaı oljaǵa molynan kenelmek bolǵan oıy iske aspaı, ol Atyraý qalasynda polısııa qyzmetkerleriniń qolyna tústi. Esirtki tasymaldaýshynyń zańsyz áreketin egjeı-tegjeıli qaraǵan sot ony Qylmystyq kodekstiń 297-baby 3-bóligi 3-tarmaǵy boıynsha kináli dep tanýǵa úkim shyǵardy. Osy úkimge sáıkes jeke menshigindegi múlki tárkilenip, 11 jyl merzimge bas bostandyǵynan aıyrý jazasy taǵaıyndaldy. Joldasbek Shópeǵul. Derek: Atyraý oblystyq sotynyń baspasóz qyzmeti. Sýret: ridus.ru.