Memlekettik syılyq ıegerleri Atyraýdyń qurmetti azamaty atandy

ATYRAÝ. 27 qańtar. О́tken jyldyń aıaǵynda Elbasy Jarlyǵymen Memlekettik syılyqtyń ıegeri atanǵan bir top munaıshyǵa Atyraý oblysynyń qurmetti azamaty ataǵy berildi. Bul týraly egemen.kz tilshisi habarlady. Atyraý oblystyq máslıhatynyń depýtattary 18 qańtarda kezekten tys ótkizilgen HHHIH sessııada Memlekettik syılyqtyń ıegerleri Oral Aqsholaqov, Qýandyq Baltabekov jáne Qurmanǵazy Esqazıevke (sýrette) «Atyraý oblysynyń qurmetti azamaty» ataǵyn berý jónindegi usynysqa qoldaý bildirdi. О́ıtkeni, bul munaıshylar elimizdiń munaı-gaz ónerkásibi salasynyń órkendeýine, sondaı-aq, Atyraý oblysynyń damýyna da  laıyqty úlesterin qosqan. Byltyr bul munaıshylar «Qazaqstan Respýblıkasynyń kómirsýtegi áleýetin ǵylymı negizdeý» taqyrybyndaǵy ujymdyq jumysy úshin ǵylym men tehnıka salasyndaǵy ál-Farabı atyndaǵy Memlekettik syılyqtyń ıegeri atanǵan bolatyn. Qazaq munaıynyń alǵashqy tamshysy alynǵan qazynaly oblystyń qurmetti azamaty atanǵan munaıshynyń bári de Atyraýdaǵy munaı-gaz ónerkásibinde eńbek etip, tolymdy tájirıbe jınaǵan. Sonyń biri Qurmanǵazy Esqazıev qazaq munaıynyń qarashańyraǵy – «Embimunaıgaz» aksıonerlik qoǵamyn basqaryp, qazir «QazMunaıGaz» Barlaý О́ndirý» aksıonerlik qoǵamyna jetekshilik etedi. Joldasbek Shópeǵul. Derek, sýret: egemen.kz.