Baıqońyrda bes jyl zańsyz turǵan

Ádette, Baıqońyr qalasyna kirý degenińizdiń ózindik mashaqaty bar. Tártibi qatal shaharǵa shaqyrtýsyz kire almaısyz. Aldymen arnaıy sá­lemdeme jiberedi. Sol qaǵazdy us­tap, arnaıy beketke kelgenińizde, ar jaǵynan týysyńyz, ne tanysyńyz kútip alýy kerek. Jabyq rejimdegi shaharǵa kóringen kirip-shyǵa almaıtyny da sondyqtan. Shyǵar kezde de kerekti qujattaryńyz kem bolsa, beketten beri asa almaı ábiger bolasyz. Al osyndaı tártibi qatań qalada bir adam bes jyl zańsyz turypty. Múm­kin be? Biz múmkin emes dep oıla­ǵanbyz. Sóıtsek... solaı eken. Kóshi-qon týraly zańdy belden basyp júrgen kim deısiz ǵoı. Ol, tipti, Qazaqstannyń da azamaty emes. Kórshi О́zbekstannan kelgen adam kórinedi. Baıqońyr qalalyq sotynda álginiń isi qaraldy. Másele bylaı bolypty. 2011 jyly zańdy buzǵan kórshi eldiń azamaty aǵasynyń mereıtoıyna keledi. Sodan qalyp qoıady. Sol qalǵannan bes jyl boıy Baıqońyrda turady. Sottyń: «Nege elińe qaıtpadyń?» degen suraǵyna «aqsham bolmady» dep jaýap beripti. Ala taqııaly aǵaıyndardyń   shek­­a­r­a­­­nyń bergi betinde nemen aı­na­ly­saty­ny belgili ǵoı. Qury­lys­qa je­giledi. Onyń «aqsham bolma­dy» de­geni syltaý ǵana shyǵar. Áıtpese, bes jyl boıy jumyssyz adamdy kim baǵyp-qa­ǵady? Sonymen, Baıqońyrda zańsyz bes jyl turǵan ózbek azamaty sottyń sheshimimen elden shyǵarylatyn boldy. Qaıtýǵa aqsha tappaı júrgen kelimsekti sot solaı jazalady. Erjan BAITILES, «Egemen Qazaqstan». Qyzylorda oblysy.