Almatyda balabaqshalar quny eki ese arzandaıdy

ALMATY. 28 qańtar. Almaty qalalyq máslıhatynyń 50-shi sessııasynda depýtattar memlekettik balabaqshaǵa baratyn árbir bala úshin tólenetin aqy qunyn 15 myń teńgeden asyrmaý jóninde qaýly qabyldady. Bul týraly Almaty qalasy ákiminiń baspasóz qyzmetine silteme jasaǵan egemen.kz tilshisi habarlady. Esterińizge sala keteıik, «Nur Otan» partııasynyń Almaty qalalyq fılıalynyń depýtattar  fraksııasy 2016 jyldyń 22 qańtarynda qaladaǵy memlekettik balabaqshalardy sharýashylyq esepten memlekettik tapsyrysqa kóshirý týraly bastama kótergen edi. Osylaısha, bıylǵy jyldyń 1 aqpanynan bastap eki jastan bes jasqa deıingi memlekettik balabaqshaǵa baratyn 17 myń búldirshin úshin tek tamaqtaný quny ǵana tólenetin bolady. Bul úshin jergilikti bıýdjetten ótken jyldyń qorytyndysy boıynsha, únemdelgen qarjydan 3 mıllıard teńgege jýyq qarjy bólinedi. «Bizde turmysy tómen jandardyń problemalaryn sheshý múmkindikteri bar. Sondyqtan búgin balabaqshalar qunyn ósirýdiń ornyna biz 17 myń búldirshinniń qunyn tómendetip otyrmyz, osynyń arqasynda árbir otbasy 20 myń teńge kóleminde qarjysyn únemdeıtin bolady», – dedi sessııa barysynda Almaty qalasynyń ákimi Baýyrjan Baıbek. Budan ózge memlekettik balabaqshada jumys istep, 48 myń teńge kóleminde ortasha jalaqy alatyn 3360 tárbıeshige 30 paıyz qosymsha aqy tólenetin bolady. Aınash Esalı. Derek, sýret: egemen.kz.