Mańǵystaýdaǵy ken oryndarynda saılaý ýchaskeleri qurylady

AQTAÝ. 28 qańtar. Mańǵystaýda ken oryndarynda 5 saılaý ýchaskesi jumys jasaıtyn bolady. Bul týraly lada.kz saıtyna silteme jasaǵan egemen.kz tilshisi habarlady. Mańǵystaý oblysy boıynsha saılaý komıssııasynyń tóraǵasy Esen Kúmisqalıdiń aıtýynsha, vahtalyq ádispen jumys jasaıtyn munaı-gaz salasynyń qyzmetkerleri saılaýda daýystaryn óz jumys oryndarynda beredi. Sondyqtan, 20 naýryz kúni ken oryndarynda 5 saılaý ýchaskesi jumys jasamaq. Onyń úsheýi Túpqaraǵan aýdanynda bolsa, ekeýi Mańǵystaý aýdanynyń aýmaǵynda ornalasady. Bul ýchaskelerde 7,5 myń saılaýshy daýys beretin bolady. «Saılaý ýchaskeleri Qalamqas, Qarajanbas, Qaraqudyq, Soltústik Bozashy ken oryndarynda jumys jasaıdy. Adam sanynyń kóbeıýine baılanysty bıyl Qalamqasta eki saılaý ýchaskesi ashyldy. Sondaı-aq, Soltústik Bozashyda da buryn ýchaske joq edi. Bıyl ol jerden de ashyp otyrmyz», – deıdi Esen Kúmisqalı. Tóraǵanyń aıtýynsha, 20 naýryzda Mańǵystaý oblysynda 115 saılaý okrýgi men 199 saılaý ýchaskesi jumys jasaıtyn bolady. Gúlaıym Shyntemirqyzy. Derek: lada.kz. Sýret: khabar.kz.