Tegin taýar

Semeıde áleýmettik dúken ashyldy Semeı qalasynda «Bári de rı­za­­shylyq úshin» ataýymen eki áleý­mettik dúken ashyldy. Dúkenge muqtaj jandar kelip, ózderine qajetti zattardy tegin alýyna bolady. Atalǵan ortalyqty qurý ıdeıa­sy «Halyq súıiktisi-2015» ulttyq syılyǵy baıqaýynda erekshe atalyp ótip, úzdik áleýmettik bas­tama retinde tanylǵan bolatyn. Dúken sóreleri qala turǵyndarynyń qaıtarymsyz beretin taýarlarynyń esebinen tolyǵyp otyrady. Onyń ishinde taza, tipti múldem kıilmegen kıimder, aıaq kıimder, balalarǵa arnalǵan zattar, azyq-túlik jáne basqa da tutyný zattary bar. Zattardy qabyldaý pýnkti qazir jumys istep tur. – Bul dúken – bıznestiń áleýmettik jaýapkershiliginiń kórsetkishi ispetti. Biz qaıyrymdylyq isti qoldaı otyryp, shaǵyn jáne orta kásipkerlik jetekshilerin áleýmettik jaǵynan az qamtylǵan halyqqa qoldaý kórsetýge shaqyramyz, – dedi Ulttyq kásipkerler palatasynyń Shyǵys Qazaqstan oblystyq fılıalynyń dırektory Igor Shaskıı. Ol sondaı-aq, dúkendi taýarmen qamtamasyz etip, kómekterin usynǵan jekelegen kásipkerlerge rızashylyǵyn bildirdi. Máselen, áleýmettik dúkenge «Ýk Iýnıs» JShS jalpy somasy 118,3 myń teńge turatyn 910 dana jańa shulyq syılap, materıaldyq kómek kórsetse, «Smok» bazary 60 myń teńge kóleminde oıynshyqtarmen qamtamasyz etti. Áleýmettik dúkenderdi qurý ıdeıasy negizinen qala qoǵamyna tıesili. Belsendilerdiń bastamasy blogerlerdiń qyzý qoldaýyna ıe bolyp, úzdik áleýmettik bastama retinde tanylǵany málim. – Bul – joǵary marapat. Bizdiń jobamyz qala turǵyndarynan jaqsy baǵa alyp qana qoımaı, muqtaj jandarǵa shyn máninde kómek kórsete alady dep oılaımyz. «Bári de rızashylyq úshin» dúkeniniń qyzmetine sáttilik tileımiz, – dedi atalǵan sharany uıymdastyrýshylardyń biri Lıýdmıla Mıhaılova. Dýman ANASh, «Egemen Qazaqstan». SEMEI.