Jarqyraǵan páterler, qýanyshty kóńilder

Oblys ortalyǵyndaǵy Gagarın kóshesi, 76/3 mekenjaıy boıynsha taǵy da bir kóp qabatty turǵyn úıdiń qurylysy aıaqtaldy. Bul joly páterlerdiń kiltteri bıýdjettik jáne áleýmettik sala qyzmetkerlerine tabys­taldy. Taǵy da deıtinimiz, byltyr mysaly, «Qoljetimdi baspana-2020» jáne О́ńirlerdi damytý baǵdarlamalary aıasynda 9 turǵyn úıdiń qurylysy bastalyp, 4-ýi paıdalanýǵa berildi. Jańadan salynǵan bıik úıdiń qasynan 1200 oryndyq jańa qazaq mektebi oqýshylarǵa esik ashty. Al, Gagarın kóshesindegi úıden 76 otbasy páter aldy. Turǵyndardy oblys ákimi Qanat Bozymbaev qýanyshtarymen quttyqtady. – Aldaǵy jyly oblys ortalyǵyndaǵy «Saryarqa» shaǵyn aýdanynda qazir qurylysy júrgizilip jatqan kópqabatty 4 úıdi qoldanysqa berýdi josparlap otyrmyz. Ár qazaqstandyq páterge qol jetýi úshin memleket tarapynan múmkindikter jasalýda, – dedi Q. Bozymbaev. Jarqyraǵan jaqsy páterge qol jetkizgen Sholpan Shákenova baspana kezeginde 11 jyl turypty. Memlekettik baǵdarlamanyń kómegimen úıge qoly jetip, 2 bólmeli páter aldy. Jalǵa alý merzimi 9 jyl. Sholpan apaıdan basqa turǵyndardyń bir bóligi memlekettik baǵdarlama kómegimen bas­panany jalǵa alsa, endi bir bóligi Qazaqstan turǵyn úı qurylys jınaq bankiniń salymshylary. Dáriger Radık Mýfasalov baspanany jalǵa berý baǵdarlamasynyń bolǵany jas otbasylar úshin jasalǵan múmkindik, deıdi. «Bizder sııaqty ár otbasynyń óz úıi bolsyn», – deıdi páterge qoly jetkender. Jańa páter ıelerin «Qazaqstan turǵyn úı qurylys jınaq banki» AQ basqarma tóraǵasy Aıbatyr Jumaǵulov ta quttyqtady. – Oblys turǵyn úı qurylysy boıynsha elimizde alda keledi. Bank salymshylary jınaǵan qarjysy nátıjesinde baspanaly bolýda. Bıik-bıik úıler turǵyzǵan qurylysshylarǵa, oblystyq ákimdikke rahmet! – dedi ol. Farıda BYQAI, «Egemen Qazaqstan». PAVLODAR. Sýretterdi túsirgen Valerıı BÝGAEV.