Erli-zaıypty ekıpaj

Qaraǵandyda qoǵamdyq kólikte jolaýshylarǵa qyzmet kórsetýshiler arasynda «Úzdik ekıpaj» dep atalatyn qyzyqty konkýrs ótip jatyr. Avtobýstary oblys ortalyǵyndaǵy «maıly» marshrýttarǵa qatynaıtyn №3 avtopark pen eKaraganda.kz aqparattyq portaly ár aı saıyn jolaýshylarǵa sapaly qyzmet kórsetetin ekıpajdy anyqtap otyrady. Konkýrs erejesi boıynsha, jyl sońynda 12 úmitkerdiń ishinen 2016 jylǵy eń úzdik ekıpaj tańdalyp alynbaqshy. Qańtar aıynyń úzdik ekıpajy bolyp erli-zaıypty Arman men Maqpal Jaqsybaevtar tanyldy. Jaqsybaevtar úlgili otbasylar sanatynan. Olardyń jelkildep ósip kele jatqan úsh uldary bar. Ekeýiniń №43 marshrýtta jumys istep kele jatqandaryna bıyl tup-týra 15 jyl bolady eken. Arman men Maqpal – jarasymdy jup. Olar ómirdiń ózinde ǵana emes, jumys barysynda da bir-birin aıtqyzbaı túsinedi. Mysaly, Maqpal jolaýshylardan jolaqyny jınap úlgermeı jatqanda, Arman avtobýstyń jyldamdyǵyn baıaýlata qoıady eken. Qaı aıaldamadan shamamen qansha adam otyratynyn da olar jatqa biletin kórinedi. О́ıtpeıinshe taǵy bolmaıdy: olardyń kúndelikti tabysy osy tıyn-tebennen quralady. Avtobýstyń ishinde adam kóp bolǵanda Maqpaldyń qaǵilezdigi kóp kómegin tıgizedi eken. Iin tiresip turǵan jolaýshylardyń arasyna synalap kirip, jolaqy jınaýdyń ózi aıtqanǵa ońaı. Al Maqpal bolsa, mundaı jaǵdaıda ózin sýdaǵy balyqtaı sezinedi. Arman men Maqpal qyzmet etetin №43 marshrýttyń uzyndyǵy 26 shaqyrymdy quraıdy. Bir kúnniń ishinde olardyń avtobýsy on aınalym jasaıdy. Bul degenińiz – 260 shaqyrym! «Bári jaqsy, – deıdi avtobýs júrgizýshi Arman. – Tek, Maı­qudyqqa kelgendegi joldyń oıqy-shoıqylyǵy bolmasa. Ásirese, 13 jáne 14-shi shaǵyn aýdandar arasyndaǵy jol adamdy sharshatyp jiberedi...». О́zderiniń jumysyn adal jáne sapaly atqaryp júrgen Arman men Maqpaldyń bıylǵy jyldyń eń úzdik ekıpajy bolýǵa tolyq talasy bar. Qaırat ÁBILDINOV, «Egemen Qazaqstan». QARAǴANDY.