Soltústik Qazaqstanda «Asyl mura» ortalyǵynyń orny bólek

PETROPAVL. 9 aqpan. Oblystyq tarıhı-ólketaný murajaıy janyndaǵy «Asyl mura» ǵylymı-zertteý ortalyǵynyń 15 jyldyǵy aıtýly oqıǵa retinde atap ótildi. Bul týraly oblystyq mádenıet basqarmasynyń baspasóz qyzmetine silteme jasaǵan egemen.kz tilshisi habarlady. Shara Sábıt Muqanov atyndaǵy ǵylymı-ámbebap kitaphanada uıymdastyrylyp, oǵan oblys ákiminiń orynbasary Anarhan Dúısenova qatysty. Ǵylymı-zertteý ortalyǵynyń jetekshisi Tańat Súgirbaev uıymnyń qurylý, qalyptasý kezeńderi jaıly keńinen baıandap berdi. Atalǵan ýaqyt ishinde 69 kitap pen 200-den astam maqala jarııalanypty. Jaryq kórgen zertteýlerdiń basym bóligi óshken tarıhymyzdy túgendep, ulttyq mádenıetimiz ben tól ádebıetimizdi qaıta jańǵyrtý sekildi súbeli taqyryptarǵa arnalǵan. Búginde ortalyq tarıhqa, mádenıetke jáne sóz ónerine qyzyqqan qaýymǵa mol aqparat beretin ǵylymı jáne tarıhı shańyraqtyń biri sanalady. Kásibı adaldyq, saýattylyq sekildi zor jaýapkershilikti arqalaǵan jergilikti ólketanýshylar jurtshylyqqa esimderi tanylmaı kelgen uly tulǵalardyń ómirleriniń beımálim qyrlaryn zerttep, zerdeleýde atqarǵan eńbekteri orasan. Anarhan Qalıqyzy oblys ákimi Erik Sultanovtyń atynan ortalyq jetekshisi Tańat Súgirbaevqa «Alǵys hat» pen syılyq tabys etti. Sábıt Muqanov atyndaǵy oblystyq qazaq sazdy-drama teatrynyń ártisteri «Qojabergen men Sabalaqtyń kezdesýi» qoıylymynan úzindi usyndy. О́mir Esqalı. Derek, sýret: egemen.kz.