Jańaózende Mańǵystaý oblysyndaǵy eń iri meshit salynýda

AQTAÝ. 9 aqpan. Mańǵystaý oblysyndaǵy eń iri meshit Jańaózen qalasynda salynýda. Bul týraly Skifnews.kz saıtyna silteme jasaǵan egemen.kz tilshisi habarlady. Osydan 3 jyl buryn bastalǵan meshittiń qurylysyna mańǵystaýlyqtar bastama kóterip, qurylys jumystaryna jumsalyp jatqan qarajatty jergilikti turǵyndar ózderi jınap bergen. Halyqtan jınalǵan aqshany maqsatty túrde jumsaý úshin «Yntymaq» qory qurylǵan bolatyn. Alǵashynda qorǵa jergilikti turǵyndarmen birge, «QazMunaıGaz» jumysshylarynyń sadaqasynan túsken 79 mıllıon teńge jınalǵan. Atalmysh kólemdegi qarjy meshittiń tek birinshi qabatyn salýǵa ǵana jetken. Sonan soń, meshit qurylysy 2 jylǵa toqtap, 2015 jyldyń qazan aıynda qorǵa túsken 5,6 mıllıon teńge qarjy negizinde jalǵasyn taýyp, osy aqshaǵa meshit aýlasynan ashana salynyp, kógaldandyrý jumystary júrgizildi. Qazirgi tańda demeýshilerdiń kómegimen neke bólmesi men balalardy oqytýǵa arnalǵan dárishanalar, qyzmettik bólmeler jáne namazhana ornalasqan ǵıbadat úıiniń ekinshi qabaty salynyp bitti. «Bul Mańǵystaý oblysyndaǵy eń úlken meshit bolady. Eger Aqtaýdaǵy ortalyq meshitke 1000 adam syıatyn bolsa, munda bir mezgilde 1500 adam namazǵa jyǵyla alady. Qazirgi tańda meshit qurylysna óz erikterimen kelip 25 adam eńbek etýde. Aıt namazyna deıin qurylys jumystaryn tolyq aıaqtaýdy josparlap otyrmyz», – deıdi qurylystyń basy-qasynda júrgen kásipker Q.Qyzanbaev. Meshitti tolyqtaı salyp bitirý úshin taǵy 200 mıllıon teńgedeı qarajat qajet. Gúlaıym Shyntemirqyzy. Derek: skifnews.kz. Sýret: inform.kz.