AQTО́BE. 9 aqpan. Aqtóbe oblystyq sotynyń ǵımaratynda «Sottardyń BAQ-pen ózara yqpaldastyq jumysyn jetildirý» taqyrybynda dóńgelek ústel ótti. Oǵan oblystyq sottyń alqa, qalalyq jáne mamandandyrylǵan sottardyń tóraǵalary, respýblıkalyq jáne jergilikti BAQ ókilderi qatysty. Bul týraly egemen.kz tilshisi habarlady.
Dóńgelek ústeldi kirispe sóz sóılep ashqan oblystyq sot tóraǵasy Erlan Aıtjanov sot júıesiniń bedeli halyqtyń oǵan degen kózqarasy, senimi arqyly aıqyndalatyndyǵyn, sottardyń jumysy halyq úshin qoljetimdi bolýy kerektigin atap ótti. Sot júıesin jetildirý maqsatynda 2016 jyldyń 1 qańtarynan bastap respýblıka sottary jańa formattaǵy jumysqa kóshkenin málimdedi. Joǵary kásibı bilikti sýdıalardyń korpýsyn qurýǵa, sot júıesin jańǵyrtýǵa, ınvestısııalyq daýlar boıynsha sot óndirisiniń jańa modelin qurýǵa jáne sýdıalardy zeınetaqymen qamsyzdandyrýdy jetildirýge baǵyttalǵan zańnamalarǵa ózgerister engizilgenine, sonymen qatar jańa Azamattyq prosestik kodeks qabyldanǵanyna toqtaldy. Sondaı-aq, ol bıyl jańa «Sýdıalar ádebi» kodeksiniń qabyldanatynynan habardar etti.
Kezdesýde oblystyq sottyń BAQ-pen jumysty úılestirýshi-sýdıasy M.Jarqynbekov ótken jylǵy jumysty qorytyndylady. BAQ-taǵy oblystyń sot júıesine qatysty jarııalanymdar týraly jergilikti RIKA medıa tobynyń bas redaktory M.Vasıleva baıandady, al, respýblıkalyq «Zań» gazetiniń menshikti tilshisi B.Janshaeva osy baǵyttaǵy jumysty jetildirý jaıynda óz usynystaryn jetkizdi. Sottar ákimshisiniń basshysy Á.Mambetov oblys sottarynyń jumysynda aqparattyq-kommýnıkasııalyq tehnologııalardy engizý boıynsha túsinik berdi.
Sot jáne buqaralyq aqparat quraldarynyń arasyndaǵy baılanystyń tıimdiligi, sot júıesiniń ashyqtyǵy men qoljetimdiligi máseleleri boıynsha BAQ-pen qarym-qatynasty damytýǵa qosqan úlesi jáne jumystaǵy joǵary kórsetkishteri úshin Aqtóbe qalasynyń №2 soty birinshi, Aqtóbe oblysynyń mamandandyrylǵan aýdanaralyq ekonomıkalyq soty ekinshi jáne Shalqar aýdandyq soty úshinshi oryndy ıelenip, Alǵys hattarmen marapattaldy.
Kezdesý sońynda BAQ ókilderiniń barlyq saýaldaryna jaýap berilip, sot júıesinde júrgizilip jatqan reformalardyń mańyzy men mazmuny túsindirildi.
Satybaldy Sáýirbaı.
Derek, sýret: egemen.kz.
