Qostanaı qalasynyń kýbogi úshin ótken jarys elimiz Táýelsizdiginiń 25 jyldyǵyna arnaldy.

Qostanaı qalasy kýbogi úshin shańǵyshylar jarysy Táý­elsizdiktiń 25 jyldyǵyna ar­­naldy. Shańǵyshylar qardyń aýyr­lyǵyna qaramastan jarys qyzyǵyna tústi. «2030 jyldary halqymyzdyń 30 paıyzy sportpen, deneshynyqtyrýmen aınalysady» degen Elbasy tapsyrmasy údesinen osyndaı ıgi ister shyǵarsa kerek-ti. Jarystyń saltanatty ashylýynda sport pen deneshynyqtyrý Máńgilik El ıdeıasyn murat tutqan elimiz jastarynyń serigi ekeni aıtyldy. – Tarıh tuǵyrynan qarasaq elimiz Táýelsizdigin alǵan 25 jyl kóp ýaqyt emes. Alaıda, osy az ǵana jylda Qazaqstanda qanshama úlken ister júzege asty. Bizdiń oblysymyzdyń ózinde qanshama sport keshenderi men alańdary jasaldy. Aýdandar men qalalardyń barlyǵynda sport bólimderi belsendi jumys isteıdi, balalar men jasóspirimder sport mektepteri qalpyna keltirildi. Olardan elimizdiń namysyn qor­ǵaǵan, atyn aıdaı álemge áıgili etken sportshylar, Olımpıada júldegerleri ósip shyqty. Qos­tanaı elimizdiń soltústik aýdan­darynyń biri bolǵandyqtan, qysqy sport túrleri bizde keń qanat jaıǵan. Sonyń ishinde shańǵy sportynan ataqty Ivan Garanındi, Olga Seleznevany, Evgenıı Bondorenkony, ataqty jattyqtyrýshy Ivan Veprevti maqtanysh etemiz. Búgingi jarys ta óńirimizde shańǵy sportynyń damı túskenin pash etedi, – dedi oblystyq deneshynyqtyrý jáne sport basqarmasy basshysynyń orynbasary Evgenıı Vılıams. Munan keıin sórege turǵan úsh júzden astam shańǵyshylar tóreshi buıryǵynan keıin júıtkı jóneldi. Olardyń arasynda qaladaǵy Ba­lalar men jasóspirimder sport mektepteriniń sportshylary, kolledjder men mektepter oqý­shylary, áýesqoı shańǵyshylar bar edi. Sonymen qatar, qalalyq jarysqa Taran aýdany men Rýd­nyı qalasy shańǵyshylary da qonaq retinde qatysty. Aıtýly merekege arnalǵan shańǵyshylar jarysynyń ózi sport merekesine aınaldy. Oppa qarda úlken de, kishi de shańǵy tepti. Qys qyzyǵy taýsylmaıtyndaı, taza aýada qalalyqtar serpilip qaldy. Degenmen, jarystyń aty – jarys. Bul joly erler komandasynda Aleksandr Breındbah – birinshi, Aleksandr Parhomenko – ekinshi, rýdnyılyq Vıktor Matıev – úshinshi orynǵa taban tiredi. Al áıelder arasynda birinshi bolyp Zarına Býkýtova, ekinshi – tarandyq Valentına Kazanseva, úshinshi – Lıza Selezneva keldi. Oza shapqandarǵa sertıfıkat, maqtaý qaǵazdary tapsyryldy. Názıra JÁRIMBETOVA «Egemen Qazaqstan». QOSTANAI.