Qazaqstandyqtar – jartylaı fınalda

  Serbııa astanasy – Belgrad qalasynda ótip jatqan fýtzaldan Eýropa chempıonatynda Qazaqstan quramasy jartylaı fınalǵa joldama aldy. Shırek fınalda qazirgi qurlyq chempıony – Italııamen kezdesken jerlesterimiz 5:2 esebimen basym túsip, kezekti ret sensasııa jasady. Kezdesýdiń alǵashqy mınýttarynan bastap basymdyq kórsetken qazaqstandyqtar qar­sy qaqpaǵa toqtaýsyz shabýyl­daýmen boldy. Alaıda, alǵashqy gol 16-mınýtta ǵana soǵyldy. Buryshtan dopty oıynǵa qosqan komanda kapıtany Dinmuhambet Súleımenov komandalas áriptesi Leoǵa soqqy jasaıtyn tamasha múmkindik jasap berdi. Sońǵysy ony shirene soǵyp, qaqpaǵa túsirdi. Birinshi taımnyń sońynda Kakaýdyń shákirtteri esepti eseledi. Bul joly da gol Leonyń qatysýymen soǵyldy. Atap aıtqanda, onyń aıyp alańynyń syrtynan tepken doby qaqpa baǵanasynan keıin serpilgen. Qaqpashynyń dopty qaıtara almaı, qarbalasqa túsken sátin tıimdi paıdalanǵan quramanyń surmergeni Serik Jamanqulov chempıonat barysyndaǵy tór­tinshi golyn soqty. Qazirgi kezde bul qazaq fýtbolshysynyń týrnırdiń mergender kóshinde aldyńǵy qatarda turǵanyn maq­tanyshpen atap ótken jón. Ekinshi taım Italııanyń shabýy­lymen bastaldy. Nátı­jesinde 23-mınýtta Fortıno mergendigimen kózge túsip, esep aıyrmasyn qysqartty. Arada bar bolǵany 30 sekýnd ótkende, Qazaqstan sapynan Shyńǵys Esenamanov tamasha goldyń avtory atanyp, esepti 3:1-ge jet­kizdi. Shyńǵystyń alańnyń orta tusynan tepken dobyna Italııa qaqpashysy esh qaıran kórsete almady. Qaqpalaryna úshinshi dop jiberip alǵan ıtalııalyqtar taıly-tuıaǵymen alǵa umtyldy. Alaıda, olardyń oıyndaryna sáttilik jetispeı, tepken doptary birde qaqpa mańdaıshasynan keıin serpilse, endi birde baǵanaǵa tıip, baǵytyn ózgertip jatty. Al keıbir sátte Qazaqstan quramasynyń jarty komandasy sanalyp júrgen qaqpashy Igıta ıtalııalyqtardyń joıqyn shabýyldaryna laıyqty toıtarys berip otyrdy. Kezdesýdiń 35-mınýtynda ózderiniń jeńilip jatqandaryna sene almaǵan Italııanyń bas jattyq­tyrýshysy Roberto Me­nı­chellı taım-aýt alýǵa máj­búr boldy. Shákirtterinen aqyl-keńesin aıamaǵan ol qaqpashyny da oıynshy retinde alańǵa shyǵardy. Osy taktıka óz jemi­sin berip, Italııa fýtbolshylary 37-mınýtta taǵy bir gol soqty. Bul joly nátıjeli soqqy Kanaldiń enshisine jazyldy. Sol-aq, eken bizdiń bas jat­tyqtyrýshy Kakaý da óz qu­qyn paıdalanyp, taım-aýt aldy. Bir qyzyǵy, bul áreket te nátıjeli bolyp, jerlesterimiz qarsylastar qaqpasyna tórtinshi goldaryn engizdi. Qaqpa baǵana­synan keıin serpilgen dopty qaıta tepken Dáýren Nurǵojın qazaq fýtzalynyń tarıhynda Eýropa chempıonatynyń fınaldyq kezeńinde gol soqqan oıynshy retinde jazyldy. Oıynnyń núktesin esep ashqan fýtbolshy Leo qoıdy. Matchtyń sońǵy sekýndtarynda alystan bos qaqpany dál kózdegen ol dýbldiń avtory atandy. Osylaısha, qurlyq birin­shiligine alǵash ret qatysyp otyrǵan Qazaqstan jartylaı fınalǵa deıin jetti. Endi týr­­nırdiń atalǵan satysynda bizdiń qurama Ispanııamen synǵa túsedi. Bul oıyn búgin túnde oınalady. Al jartylaı fınaldyq ekinshi jupty Serbııa men Reseı quramalary qurady. Elaman QOŃYR, «Egemen Qazaqstan».