Qazaqstan qola júldege talasady

Keshe fýtzaldan Eýropa chempıonatynda synǵa túsip jatqan Qazaqstan quramasy jartylaı fınal­da Ispanııamen kezdesti. Tartysty ótken match qarsy­lastarymyzdyń paıdasyna 5:3 esebimen aıaqtaldy. Kezdesýge komandamyzdyń kósh­basshy oıynshysy, qaqpashy Igıta qatysa almady. Oǵan aldyńǵy oıyndarda alǵan eskertýleri sebep boldy. Sondaı-aq, taǵy bir negizgi oıynshymyz Shyńǵys Esenamanov ta jaraqaty saldarynan kezdesýdi alań jıeginen tamashalaýǵa májbúr boldy. Soǵan oraı quramanyń bas jattyqtyrýshysy Kakaý qaqpa kiltin Grıgorıı Shomroǵa senip tapsyrdy. Ol da Igıta sııaqty qajet kezde qaqpasyn tastap shyǵyp, shabýyldaǵy áriptesterine kómekteskenimen, oıynǵa aıtar­lyqtaı qan júgirte almady. Jalpy, Igıta men Esenamanov­tyń alańda joqtyǵy match barysynda aıqyn sezildi. Áıtse de, komandamyzdyń oıynyna joǵary baǵa bergenimiz jón. Sebebi, qurlyqtyń alty dúrkin chempıony degen ataǵy bar azýly qarsylasqa bizdiń jigitter laıyqty qarsylyq kórsetti. Tipti, alǵashqy mınýttardan bastap alǵa umtylyp, birinshi bolyp gol soqqan Qazaqstan eýropalyqtarǵa eriksiz baı shaıqatty. Atap aıtqanda, kezdesýdiń 4-mınýtynda urymtal sátti múlt jibermegen Aleksandr Dovgan esep ashty. Alaıda, jerlesterimiz bul ba­symdyqty uzaq ustap tura almady. Ispandar 8-mınýtta Bebeniń kómegimen tarazy basyn teńestirip ketti. Osydan keıin oıyn teń jaǵdaıda órbip, qos komanda alma-kezek shabýyldar uıymdastyrdy. Al úziliske 3 mınýt ýaqyt qalǵanda qarsylastarymyz qarqynyn kú­sheıtip, bas-aıaǵy birer mınýttyń ishinde eki gol soǵyp ketti. Aldymen 17-mınýtta Mıgelına mergendigimen kózge tússe, araǵa bir mınýt salyp Raýl Kampos esepti 3:1-ge jetkizdi. Ekinshi taım Qazaqstannyń shabýy­lymen bastaldy. Degenmen, Leo men Serik Jamanqulov uıymdastyrǵan bul shabýyl aıaqsyz qaldy. О́z kezeginde ıspandar berilgen múmkindikti qur jibermeı, Aleks 26-mınýtta komandasynyń tórtinshi dobyn engizdi. Iri esepke qaramastan, bizdiń jigitter shabýyldaryn jalǵastyra berdi. Saýatty qımyldaǵan olar esep aıyrmasyn bir dopqa deıin qysqartqan bolatyn. Naqty aıtsaq, 36-mınýtta Mıhaıl Pershın nátı­jeli soqqy jasady. Al arada eki mınýt ótkende Serik Jamanqulov chempıonattaǵy besinshi golyn soǵyp, otandyq jankúıerlerge úmit syılady. Biraq, bizdiń kóńilimizdi sońǵy mınýttaǵy Kampostyń goly sý sepkendeı basyp tastady. Osylaısha, týrnırge alǵash ret qatysyp, jartylaı fınalǵa deıin jetken Qazaqstandy azýly Ispanııa ǵana toqtata aldy. Endi otandastarymyz alań ıesi Serbııamen qola júldege talasady. Al ıspandar fınalda Reseımen chempıondyq ataqty sarapqa salady. Bul oıyndar búgin oınalady. Elaman QOŃYR, «Egemen Qazaqstan».