Almatyda tarıhı-qujattyq kórme ótti

Almatydaǵy Qazaqstan Respýblıkasy Prezıdenti Arhıvinde Qazaqstan Respýblıkasy Ulttyq Ǵylym akademııasynyń qurylýyna 70 jyl tolýyna oraı «Eldiń ıntellektýaldy kapıtaly: Táýelsiz Qazaqstannyń zoologııa ǵylymy» atty tarıhı-qujattyq kórme jáne dóńgelek ústel ótti. Zııatkerlik kórmede Qazaq­stannyń zoologııa ǵylymynyń tarıhyn, onyń qalyptasýy jáne damýyn beıneleıtin muraǵat qujattary: Zoologııa sektorynyń qurylýy týraly hattamalar men qaýlylar, basshylardy taǵaıyndaý týraly hattamalardan úzindiler, ǵylymı-zertteý jumystarynyń josparlary men esepteri, baıanhattar, jarııalanǵan eńbekter týraly málimetter, ınstıtýttyń zertteý qyzmeti men halyqaralyq qatynastary boıynsha hat almasý usynyldy. Sondaı-aq, kórmede sırek kezdesetin, «Qyzyl kitapqa» engen jándikterdiń zoologııalyq kolleksııalary, Zoologııa ıns­tı­tý­tynyń eńbekteri ornalastyryldy. Uly ǵalymdardyń zerdeli muralaryn saqtaýda «Ǵylym orda­synyń» vedomstvolyq muraǵaty mańyzdy ról atqarýda. Derekterge baı muraǵat qorlary otandyq ǵylymnyń qalyptasýy men damýyn beıneleıtin qujat­tardyń saqtalýyn qamtamasyz etedi. Munda Qazaqstan Respýb­lıkasy Ulttyq Ǵylym akademııa­synyń ǵylymı-uıymdasty­rý­shy­lyq qyzmetiniń jáne onyń mekemeleriniń 1932 jyldan bastalatyn qundy qujattary jınaqtalǵan. Vedomstvolyq muraǵat 1946 jyly Qazaq KSR Ǵylym akademııasynyń quramynda «Ǵylym akademııasynyń mura­ǵaty» bolyp qurylǵan bolatyn. Kórmeniń saltanatty ashylýynda Qazaqstan Respýblıkasy Prezıdenti Arhı­vi­niń dırektory Borıs Japarov, Ulttyq Ǵy­lym akademııasynyń prezı­denti Murat Jurynov, Qazaq­stan Respýblıkasyndaǵy Rossotrý­dnıchestvo ókildigi bas­shysynyń orynbasary Irına Pereverzeva, Ǵylymı-tehnı­kalyq qujattama ortalyq mem­lekettik muraǵatynyń dırektory Gúlaıhan Sársenova sóz sóıledi. Dóńgelek ústel sheńberinde Pa­vel Marıkovskııdiń Prezıdent Arhıviniń qorynda saqtaýdaǵy qoljazbasynyń negizinde daıyn­dalǵan «Vospomınanııa natý­ra­­lısta, zoologa, pısatelıa» kita­by­nyń tusaýkeseri ótti. Tusaý­keser QR ǴTQ OMM-da saqtaýdaǵy Pa­vel Marıkovskııdiń jeke qory­nyń materıaldary negizinde daıyn­dalǵan kórmemen qosa ótkizildi. Aınash ESALI, «Egemen Qazaqstan». ALMATY.