Atqarylǵan ister aýqymdy, atqarylatyny da az emes

Syrtqy ister mınıstrliginiń Halyqaralyq aqparat­ komıtetiniń tóraǵasy Roman Vasılenko bizdiń ótinishimiz boıynsha byltyr ótkizilgen mańyzdy syrtqy istermen qatar, bıylǵy jyldyń alty aıynda atqarylatyn jumystar týraly aıtyp berdi. Atqarylǵan mańyzdy isterdiń qatarynda Qazaqstannyń DSU-ǵa múshe bolǵandyǵy úlken tabys retinde ataldy. Armenııa men Qyrǵyzstannyń Eýrazııalyq ekonomıkalyq odaqqa kirýi týraly kelisimsharttyń kúshine enýi de mańyzdy qadam bolǵan. Sondaı-aq, Álemdik jáne dástúrli dinder lıderleriniń Astanada ótken V sezi de ma­ńyzdy ister qatarynda kóldeneń tartyldy. Qazaqstannyń 20 shetel azamattarynan 2015 jyldyń 16 shildesinen bastap 2017 jyldyń 31 jeltoqsanyna deıingi merzimge Qazaqstanda 15 kún bolǵan ýa­qyt aralyǵynda eshqandaı vıza talap etilmeıtindigi týraly she­shim qabyldaýy da mańyzdy ister­diń qataryna jatqyzylǵan. Bul elimizdiń halyqaralyq are­nadaǵy bedelin ósire túsken ma­ńyzdy qadam ekendigi aıtyldy. Qazaqstan men MAGATE ara­synda baıytylmaǵan ýran qal­dyqtarynyń bankin elimizde qurý týraly kelisimge qol qoıýy da ótken jyldyń mańyzdy syrtqy ister jańalyǵy bolyp tabylady. Árıne, Elbasy N.Nazar­baevtyń BUU-nyń 70 jyldyq mereıtoıyna arnalǵan 70-sessııasyna qatysyp, sóz sóılegeni men onda álemdik problemalar boıynsha birqatar jańa bastamalar kótergenin Syrtqy ister mınıstrligi eń mańyzdy isterdiń qataryna qosty. Sonymen qatar, BUU Bas Assambleıasynyń bizdiń Memlekettiń basshysy kótergen Iаdrolyq qarýdan azat beıbit ómirge qol jetkizý týraly jalpyálemdik deklarasııany qabyldaýy da vedomstvonyń byltyrǵy jylǵy úlken taby­synyń biri retinde ataldy. Sonymen birge, Elbasy N.Nazar­baevtyń Qytaı, Reseı, Uly­brıtanııa, Fransııa, Iran jáne t.b. elderge jasaǵan resmı saparlaryn daıyndaý da mańyzdy ister qatarynda bolǵany aıtyldy. Sol saparlar barysynda elimizge 60 mlrd. dollardan artyq ınvestısııa tartý týraly kelisimderge qol qoıyldy, dedi R.Vasılenko. Jyl aıaǵyna taman qol jetkizilgen úlken tabys – Qazaqstannyń Eýroodaqpen 29 sala boıynsha áriptestik pen yntymaqtastyqty keńeıtý týraly kelisimge qol qoıǵany da syrtqy saıasat vedomstvosynyń úlken tabysy retinde ataldy. Sondaı-aq, ótken jyly Qa­zaqstanǵa Túrkııa, Qytaı, Úndistan, Aýǵanstan, Japonııa, Ýkraına, Reseı basshylarynyń resmı saparmen kelip, tabysty kelisimderge qol jetkizilgeni de dıplomatııalyq tabystar ekendigi retinde atalyp ótti. Bıylǵy jyldyń alǵashqy jarty jyldyǵynda bolatyn mańyzdy halyqaralyq isterdiń qatarynda EKSPO-2017 kórme­sine qatysýshylardyń 2-shi jı­na­lysynyń aqpan aıynda bolatyny jáne joǵary deńgeıdegi birqatar saparlar jasalatyny aıtyldy. Jaqsybaı SAMRAT, «Egemen Qazaqstan».