ASTANA. 21 aqpan. Búgin Taıland astanasy – Bangkok qalasynda ótip jatqan kúres túrlerinen Azııa chempıonatynda erkin kúresten 61 kılo salmaqta synǵa túsken Qazaqstan palýany Dáýlet Nııazbekov qatarynan ekinshi ret qurlyq chempıony atandy. Bul týraly egemen.kz tilshisi habarlady.
Otandasymyz fınalda Iran palýany Behnam Ihsanpýrdy 10:0 esebimen utyp, aıqyn basymdyq tanytty. Dáýlet ótken jyly da Dohada ótken Azııa chempıonatynyń sheshýshi beldesýinde dál osy ırandyq palýanmen kezdesip, jeńiske jetkenin atap ótken jón.
Osymen atalǵan saıysta Qazaqstan qorjynyna taǵy bir altyn medal túsip otyr. Buǵan deıin grek-rım kúresinen 75 kıloda el namysyn qorǵaǵan Dosjan Qartyqov Azııa chempıony atanǵan bolatyn. Sondaı-aq, «klassık» palýandardan Ashat Jańbyrov (66 kg) kúmis júldege qol jetkizse, Meırambek Aınaǵulov (59 kg), Darhan Baıahmetov (71 kg), Ashat Dilmuhamedov (80 kg) jáne Damır Kúzembaev (130 kg) qola medaldi moıyndaryna taqty.
Áıelder kúresinde qazaqstandyqtar sapynan Irına Borısova (48 kg), Elmıra Syzdyqova (69 kg) jáne Aıym Ábdildına (58 kg) – «kúmis», al Mádına Baqbergenova (60 kg) men Gúlmaral Erkebaeva (75 kg) qola júldege qol jetkizdi.
Al erkin kúresten Nurlan Bekjanov (65 kg), Jiger Zákirov (74 kg) jáne Dáýlet Shabanbaı (125 kg) Azııa chempıonatynyń kúmis júldegerleri atansa, Aslan Kahıdze (86 kg) men Baqdáýlet Álmentaı (97 kg) qorjynǵa qola medal saldy.
Elaman Qońyr.
Derek: egemen.kz.
Sýret: facebook.com.
