Jambyl oblysyndaǵy Býryl aýylynda jaǵdaı birqalypty

TARAZ. 22 aqpan. Baızaq aýdanynyń Býryl aýylynda oryn alǵan jaǵdaıǵa baılanysty tarap jatqan túrli qaýesetterdiń aq-qarasyn ajyratyp, halyqqa shynaıy aqparat jetkizý maqsatynda Jambyl oblysy ákiminiń orynbasary Erqanat Manjýov baspasóz máslıhatyn ótkizdi. Bul týraly egemen.kz tilshisi habarlady. «Jalpy, bul eldi mekende 8 ulttyń ókili turady. Onyń ishinde negizgisi – qazaqtar men túrikter. Búginde aýyldaǵy qoǵamdyq-saıası ahýal turaqty. Qaıǵyly oqıǵa oryn alǵan kúnnen bastap biz tıisti quzyrly oryndarmen birge barlyq qajetti sharalardy qolǵa aldyq.  Máslıhat depýtattarynan, aqsaqaldardan quralǵan arnaıy top qurylyp, búginge deıin osyndaǵy úılerdiń 91 paıyzyna kirip, túsindirý jumystaryn júrgizdik.  Bul jumystar aldaǵy ýaqytta da jalǵasatyn bolady. Halyqqa tek qana shynaıy aqparattar jetýi tıis. Sondyqtan sizder osyndaǵy tıisti basshylarmen, aýyl turǵyndarymen, ózge ult ókilderimen oqıǵanyń anyq-qanyǵyn anyqtaýlaryńyzǵa bolady», deıdi Erqanat Nurbapauly: Sonymen, tıisti quzyrly oryn ókilderiniń, aýyl turǵyndarynyń sózderine súıene otyryp, anyqtalǵany, aıyp taǵylyp otyrǵan kúdiktiniń otbasy 2008 jyly Qyrǵyzstannan kóship kelgen. Kúdikti D. K.-ny otbasy asyrap alǵan.  Qylmystyq oqıǵa oryn alǵan kúni D. K. kórshisiniń úıinde eshkim joq bolatynyn bilgendikten, urlyqqa túsedi. Alaıda ony 27 myń teńge urlap jatqan jerinen úıdiń 6 jasar balasy kórip qoıyp, ákesine aıtatynyn jetkizgen. Urlyǵy áshkerelengen D. K. balany aldymen tunshyqtyryp, sosyn ashana pyshaǵymen óltirgen. Qazirgi tańda ol kinásin moıyndaǵan. Áleýmettik jelilerde taraǵandaı, aýrýhanada emes, oqshaýlaý ornynda otyr. Psıhıkalyq aýytqýshylyǵy joq, deni saý. Áleýmettik jelilerde sondaı-aq, kúdiktiniń jaraqattanǵan sýreti salynyp, onyń aǵasynyń óltirilgeni týraly aqparat taraǵan bolatyn. Quqyq qorǵaý oryndary mundaı aqparattyń jalǵan ekenin aıtty. Kúdiktiniń jaraqattanyp, qolyn baılap alǵan sýreti osydan bir jyl buryn, qolyn syndyryp alǵan kezde túsirilgen bolyp shyqty. Kúdikti azamat turǵan úıdiń eki terezesi syndyrylǵany ras, al kóliktiń, úıdiń órtengeni, ult ókilderi arasynda beı-bereket buzaqylyqtyń oryn alǵany týraly derekter negizsiz. Qazirgi tańda kúdiktiniń otbasy Qyrǵyzstanǵa kóship ketken. Qalǵan ózge ult ókilderi sol eldi mekende, yntymaqta ómir súrýde. Oralhan Dáýit. Derek, sýret: egemen.kz