«Máńgilik el» poıyzynyń dárigerleri qabyldaý ótkizdi

О́SKEMEN. 22 aqpan. Shyǵys óńirine kelgen «Máńgilik el» poıyzynyń quramyndaǵy bilikti dárigerler jergilikti turǵyndardyń densaýlyǵyn tekserip, medısınalyq joldamalar berdi. Bul týraly egemen.kz tilshisi habarlady. Nevrolog, nefrolog, ýrolog, gematolog, ortoped-travmatolog, revmatolog, pýlmonolog, pedıatr, gastroenterolog, angıohırýrg, kardıolog, endokrınolog, oftalmolog, onkolog jáne hırýrg syndy medısına qyzmetkerleri poıyz toqtaǵan qalalar men kentterde qabyldaýlar ótkizip, halyqtyń densaýlyǵyn tekserip, keńes berdi. «Biz Shyǵys Qazaqstan óńiriniń turǵyndaryna rıza boldyq. Olardyń janarynan senimdiliktiń ushqynyn baıqaısyz. Barlyǵy elimizdiń gúldenýine, kórkeıýine eńbek etkisi keledi. 2016 jyl – erekshe jyl. Biz bul jyldy áleýmettik máselelerdi sheshýden bastap otyrmyz», – dedi atalǵan poıyzdyń jetekshisi Ámirjan Álpeıisov. Máselen, poıyzdaǵy dárigerler qaýymy Zyrıan qalasynda 334, Shar qalasynda 490 adamnyń densaýlyǵyn tekserip, medısınalyq qorytyndy jasady. Revmatolog-dáriger Dáýlet Medeý – Shymkenttegi oblystyq revmatologııa ortalyǵynyń dárigeri. Respýblıkadaǵy áleýetti revmatologııa ortalyǵy Ońtústik Qazaqstanda ekeni belgili. «Keıbir eldi-mekenderde kúnine otyz-qyryq adamǵa deıin qabyldadyq. Maqsatymyz – medısınanyń sońǵy jetistikterin kórsetip, dıagnozy qıyn naýqastarǵa bilikti keńes berý. Zyrıan qalasynda júrek dertine shaldyqqan tórt naýqasqa Almatydaǵy Syzǵanov atyndaǵy ulttyq ǵylymı ortalyqqa joldama berdik. Mamannyń tapshylyǵynan olar der kezinde tıisti dárigerge qaralmaı, dertterin asqyndyryp alypty», – deıdi revmatolog maman. Atalǵan poıyz búgin Semeı qalasyna keldi. Dýman Anash. Derek: egemen.kz. Sýret: ShQO Aqparattyq ortalyǵy.