О́skemendegi tegin dári

berý júıesi qalpyna keltirildi Jyl basynda óskemendik turǵyndardyń dárihanalardan tegin alyp turatyn dári-dármegi toqtap qalǵan edi. Júrek-qan talmasymen, demikpemen aýyratyn naýqastar tegin dári alyp turatyny belgili. Tipti, keıbir turǵyndar qaterli isikke qarsy áleýmettik preparattardyń múldem toqtap qalǵanyna baılanysty dárilerdi jeke qarjysyna satyp ala bastaǵanyn jetkizgen. Farmasevter arnaıy jeńildikpen beriletin dárilerdi tasymaldaýǵa arnalǵan tenderdiń áli ótkizilmegenin aıtyp, alańdaǵan adamdardyń kóńilin aýlaǵan bolatyn. Eki aıǵa jýyq ýaqyt ótkende, oblystyq densaýlyq saqtaý basqarmasy dári-dármek máselesi sheshilgenin jetkizdi. Oblystyq densaýlyq saqtaý basqarmasynyń basshysy Vadım Ovsıannıkovtyń aıtýynsha, aǵymdaǵy jyldyń 24 aqpanynan bastap bul máselelerge núkte qoıyldy. Dáriler dárihanalarǵa jetkizile bastady. Keıbir jerlerdegi dárilerdiń jetispeýshiligi nemese múldem joqtyǵy, atalǵan jumysqa jańadan qosylǵan tasymaldaýshylardyń sebebinen bolýy múmkin. Sondaı-aq, tirkeýde turǵan naýqastardyń arasynda preparattardy alý úshin dárigerdiń dári alýǵa beretin ruqsatnama qaǵazyn tenderden keıin qaıta alý týraly da sybys taraǵan-dy. Muny tıisti mekeme joqqa shyǵardy. – Tender 15 aqpanda ótkizildi. Dári alýǵa beriletin ruqsat qaǵazdyń ýaqyty boıynsha eshqandaı shekteý joq. Iаǵnı, qaǵazdyń emdelýshige qaı ýaqytta berilgeni mańyzdy emes. Dárihanadaǵy dári kez kelgen jaǵdaıda berilýi tıis, – dedi Vadım Ovsıannıkov. Dýman ANASh, «Egemen Qazaqstan». О́SKEMEN.