Qostanaıda ındýstrııalyq aımaqtyń tusaýkeseri ótti

QOSTANAI. 26 aqpan. Qostanaıda ındýstrııalyq aımaqtyń tusaýkeseri ótti. Oǵan Investısııa jáne damý mınıstri Áset Isekeshev jáne shetel ınvestorlary qatysty. Bul týraly egemen.kz tilshisi habarlady. Qostanaıda mashına qurastyrý zaýyttary qasynan túsetin óndiristik aımaq týraly birneshe jyl buryn aıtylǵan bolatyn. Mine, endi ol shyndyqqa aınaldy. Aımaqtyń ınfrastrýktýrasy jáne basqa da jumystary úshin barlyǵy 2 mıllıardtan asa teńge bólinedi. Sonyń aımaq jumysy bastalar 2 jyly úshin 1 mıllıard 100 mıllıon teńge bólinedi. О́ndiristik aımaq eki satydan turady. Alǵashqysy taza avtomobıl óndirisine baılanysty bolady. Ekinshi satysynda óńdeý, tamaq ónerkásibi damytylady. Oblys ákimi Arhımed Muhambetov: «Endi 2-3 aıdan keıin qujattardyń barlyǵy daıyndalady, qurylysy bıyl bastalady, kelesi jyly daıyn bolady. Munda 10-15 óndiris kásiporyndaryn syıǵyzatyn bolamyz. Qytaıdyń SMS SI kompanııasymen birlesip, munda avtomobıl óndirisin damytatyn bolamyz, olar osy óndiristik aımaqqa 4 zaýyt salǵaly otyr. Oblystyń mindeti óndiristik aımaqtyń ınfrastrýktýrasyn jasaý bolyp tabylady. Jer bólemiz, ol qazirgi avtomobıl zaýyttarynyń aınalasynda bolmaq. Negizgi maqsat shetel ınvestorlaryna jaǵdaı jasaý bolyp tabylady», – dedi. Investısııa jáne damý mınıstri Áset Isekeshev: «Osy jumystardyń barlyǵy Elbasynyń Ult josparyndaǵy «100 naqty qadamdy» júzege asyrý bolyp tabylady. Ondaǵy birneshe qadam Qazaqstanǵa halyqaralyq bıznes ókilderin tartýǵa arnalǵan bolatyn. Bul iste jańadan ashylyp otyrǵan óndiristik aımaqtyń bolashaǵy zor», – dedi. Mınıstrlikpen jáne Qostanaı oblysymen kelisimge kelip otyrǵan Italııa, Fransııa jáne Qytaı kompanııalary mashına qurastyrý isiniń 50 paıyzyna deıingi jumysyn Qostanaı zaýyttarynyń atqarýyna múmkindik beretinin aıtty. Názıra Járimbetova. Derek, sýret: egemen.kz