Atyraýdyń 10 aýylyna 9,7 mlrd. teńgeniń gaz qubyry salynady

ATYRAÝ. 26 aqpan. Atyraý oblysynyń Qurmanǵazy aýdanyndaǵy 10 aýylǵa gaz qubyryn júrgizý úshin 9,7 mlrd. teńge jumsalady. Bul týraly Atyraý oblysynyń ákimi Baqtyqoja Izmuhambetovtiń málimdemesine silteme jasaǵan egemen.kz tilshisi habarlady. Atyraý oblysyndaǵy eldi mekenderdiń 79,5 paıyzy, halyqtyń 98 paıyzy tabıǵı gaz júıesine qosylyp otyr. Alaıda, eń shalǵaıdaǵy ári Reseı Federasııasymen shekaradaǵy Qurmanǵazy aýdanynda áli de tabıǵı gaz jelisi tartylmaǵan birneshe aýyl bar. Aýdan  ortalyǵynan 300 shaqyrymnan astam qashyqtaǵy bul aýyldar «Azǵyr» áskerı polıgony mańynda ornalasqan. «Halyqty gazben qamtýdaǵy eń úlken joba, táýekelge bel baılap kirisken jumysymyz – Azǵyr óńirine gaz qubyryn júrgizý qolǵa alyndy. О́ńirdiń 10 aýylynda 8 myńǵa jýyq turǵyn ómir súredi. Bul jumys Elbasynyń shekara mańyndaǵy aýyldardy damytý jóninde bergen tapsyrmasyna sáıkes jasalyp jatyr. Gaz qubyrynyń uzyndyǵy 365 shaqyrym, joba quny – 9,7 mlrd. teńge. Qurylysy NCOC kompanııasynyń demeýshiligimen bıyl bastalady», – dep málim etti Atyraý oblysynyń ákimi Baqtyqoja Izmuhambetov. Joldasbek Shópeǵul. Derek: egemen.kz. Sýret: Rahym Qoılybaev.