TARAZ. 26 aqpan. Jambyl oblystyq mádenıet, muraǵattar jáne qujattama basqarmasynyń uıymdastyrýymen Taraz qalasynda jyr alyby Jambyl Jabaevtyń 170 jyldyǵyna arnalǵan respýblıkalyq «Tyńda, dala, Jambyldy!» atty jyrshy-termeshiler baıqaýy ótti. Bul týraly egemen.kz tilshisi habarlady.
Baıqaýǵa respýblıkamyzdyń ár aımaǵynan bas-aıaǵy 33 úmitker qatysyp, Qapash Qulysh, Dúısenbek О́mirálıev, Ábdimomyn Jeldibaev, Aıaz Betbaev, Elikbaı Isa syndy elimizge tanymal óner qaıratkerleri qazylyq etti.
«Árıne, Jambyl babamyzdyń buǵan deıingi mereıtoılarynda talaı óner baıqaýlary uıymdastyrylǵan. Biraq buryn-sońdy elimizdegi úzdik jyrshy-termeshilerdiń basyn qosyp, Jambyl Jabaevtyń jyr-dastandaryn nasıhattaǵan baıqaý bolmapty. Sondyqtan bul Jambyl jákemniń jyrlaryn jurtshylyqtyń júregine jetkizip qana qoımaı, termeshilerdiń de rýhyn kóterip, abyroıyn aspandatqan is-shara boldy», – deıdi Jambyl oblystyq mádenıet, muraǵattar jáne qujattama basqarmasynyń basshysy Dúısen Byqybaev.
Qazylar alqasynyń uıǵarymymen Jambyl Jabaevtyń jáne Jetisýda ómir súrgen aqyn-jyrshylardyń shyǵarmalaryn naqyshyna keltire oryndap, kórermenniń júregine jol tapqan Danııar Rahymbaı (Almaty oblysy) bas júldeni ıelendi. Birinshi oryndy Maqpal Toqtaǵanova (Almaty oblysy) jáne Sulýjan Ábenova (Jambyl oblysy) ıelense, ekinshi oryn – Jarashan Tólebaı (Qyzylorda oblysy), Erbolat Shaldybekov (Almaty oblysy), Murathan Donbaev (Shyǵys Qazaqstan oblysy), úshinshi oryn Marat Súgirbaı (Qyzylorda oblysy), Qurman Baıtasov (Astana qalasy), Tólegen Shákárimovke (Shyǵys Qazaqstan oblysy) buıyrdy.
Sondaı-aq, Súıinbaı atyndaǵy arnaıy júldeni aqtóbelik Ǵazıza Abdırova, Qaban jyraý júldesin jambyldyq Qarlyǵa Jambaeva, Saýytbek atyndaǵy júldeni taǵy bir jambyldyq Juldyz Ysqaqov, Barmaq aqyn atyndaǵy júlde atyraýlyq Baıbaq Ydyrbaı, Kenen Ázirbaev atyndaǵy júlde shyǵysqazaqstandyq Gúlmıra Temirbekova, Aıaz Betbaev atyndaǵy júldeni qostanaılyq Abzal Alpysov ıelendi.
Oralhan Dáýit.
Derek: egemen.kz.
Sýret: Aqádil Rysmahan.
