Djannı Infantıno FIFA prezıdenti bolyp saılandy

ASTANA. 26 aqpan. Búgin Shveısarııanyń Sıýrıh qalasynda ÝEFA-nyń bas hatshysy, shveısarııalyq Djannı Infantıno ekinshi týrda Halyqaralyq fýtbol federasııasynyń prezıdenti bolyp saılandy. Bul týraly TASS-qa silteme jasaǵan egemen.kz tilshisi habarlady. FIFA-nyń jańa basshysy saılaýda 207 daýystyń 115-ne ıe boldy. «Men saılaýdyń qorytyndysyn jáne oryntaqty qabyl alamyn», - dedi Infantıno saılaýdan keıin. Saılaýǵa odan basqa Azııa fýtbol konfederasııasynyń basshysy, Bahreın sheıhi Salman ben Ibragım Ál-Halıfa, Iordanııa hanzadasy Álı ben ál-Hýseın, FIFA prezıdentiniń burynǵy orynbasary Jerom Shampan qatysty. Tegi ıtalıan shveısarııalyq azamat Djannı Infantıno FIFA tarıhyndaǵy toǵyzynshy prezıdent bolyp otyr, Buǵan deıin uıymdy fransýz Rober Geren (1904-1906), aǵylshyn Denıel Výlfoll (1906-1918), fransýz Jıýl Rıme (1931-1954), belgııalyq Rýdolf Seldreıers (1954-1955), aǵylshyn Artýr Drıýrı (1955-1961), aǵylshyn Stenlı Roýz (1961-1974), brazılııalyq Joao Avelanj (1974-1998), shveısarııalyq nemis Iozef Blatter (1998-2015) basqardy. FIFA-nyń kelesi saılaýy 2019 jyly ótedi. Osylaısha Infantıno óziniń aldyndaǵy Blatterdiń mandatyn aldy. Bulardyń sońǵysy 2015 jylǵy mamyr aıynda osy oryntaqqa qaıta saılanǵan edi. Biraq uıym tóńireginde kóterilgen jemqorlyq janjalyna baılanysty artynsha qyzmetinen ketýge májbúr boldy. Djannı Infantıno 1970 jylǵy 23 naýryzda Shveısarııanyń Vale kantonyndaǵy Brıg qalasynda týǵan. ÝEFA-da 2000 jyldyń tamyz aıynan jumys isteı bastady. 2009 jylǵy qazanda uıymnyń bas hatshysy bolyp taǵaıyndaldy. Ol ÝEFA prezıdenti Mıshel Platınıdiń «oń qoly» boldy. Infantıno Eýropa chempıonatynyń fınalyna qatysatyn quramalar sanyn 16-dan 24-ke deıin kóterýdiń bastamashysy edi. Rýslan Igilik. Derek, foto: TASS.