Qazaqstan men Alstom seriktestik aıasyn ulǵaıtty

Kúni keshe «Qazaqstan temir joly» UK» AQ prezıdenti Asqar Mamın Alstom kompanııasynyń prezıdenti Anrı Pýpar Lafarjmen birge «Elektrovoz qurastyrý zaýyty» AQ-tyń jumysymen tanysty. Shara barysynda taraptar seriktestik aıasyn áli de ulǵaıtýǵa kelisim jasady. Ol boıynsha fransýzdyń Alstom kon­serni QTJ-dan 25 paıyz qosym­sha úles alyp, birlesken kásip­oryn­daǵy jalpy úlesin 50 paıyzǵa jet­kizdi. Endi «QTJ» UK» AQ pen «Trans­mash­holdıng» JAQ-ta 25 paıyz aksııadan qaldy. «Qazaqstan álemdik alpaýyt Alstom fransýz kompanııasymen birlesip kólik­tik mashına qurastyrý salasyna tike­leı ınvestısııa jáne jańa tehnolo­gııa tartý isin júzege asyrdy. Sonyń nátı­je­sinde sońǵy tehnologııaǵa negiz­del­gen jańa óndiris orny ómirge keldi», dep atap ótti A.Mamın. Alstom prezıdenti Anrı Pýpar Lafardjdiń aıtýynsha, Qazaqstanda ınvestısııaǵa qolaıly jaǵdaıdyń bári jasalǵan. Bul óz kezeginde uzaq merzimdi seriktestik ornatýǵa múmkindik beredi. EQZ arqyly jańa tehnologııalardy meńgerý qazaqstandyq mashına jasaý salasyndaǵy kóshbasshylyq róldi atqarýǵa múmkindik jasaıdy. Qazaq­standyq lokomotıvterdi álem naryǵyna eksportqa shyǵarýǵa kepildik etedi. Zaýyttaǵy qazaqstandyq úlesti kóbeıtý 2020 jylǵa qaraı 70 paıyzdy quraıtyn bolady eken. Elimizdiń bas temirjolshysynyń sózine qaraǵanda, qazirgi tańda Qazaq­stannyń temirjoldarynda saǵatyna 120 shaqyrym jyldamdyqpen júretin álemdegi eń qýatty bolyp sanalatyn KZ-8A serııasyndaǵy 31 júk loko­motıvi júıtkip júr. Sondaı-aq, saǵa­tyna 200 shaqyrym jyldamdyqpen júre­tin alty dana KZ-4AT jolaýshylar loko­motıvteri halyqqa qyzmet kórsetýde. Bularmen birge, Alstom jáne EQZ zaýyt­tyń óndiristik bazasynda elektro­vozǵa arnalǵan tartym transformatorlaryn óndirý jónindegi kelisimge qol qoıdy. Osynyń arqa­synda zaýyt Alstom konsernine atalǵan transformatorlardy shetelden jetkizetin iri kásiporynǵa aınalatyn bolady. EQZ-da transformatorlar shyǵarý 2016 jyldyń birinshi jartyjyldyǵynda bastalyp, 100-den astam jumys orny qurylady dep kútilýde. Josparlanǵan óndiristik qýattylyǵy jylyna 200-ge deıin transformatordy quramaq. Osy kelisimderdi jasasýdyń arqa­synda Alstom EQZ zaýytyn damytýǵa búkil kúshin shoǵyrlandyryp, eks­port­­tyq áleý­etke ıe álemdik sapa­­da­­ǵy jergilikti ónimdi jasap shyǵa­ra­­tyn bolady. Osylaısha EQZ Qazaq­­stan eko­nomıkasynyń negizgi qoz­ǵal­t­­qysh kúshine aınalyp, lokomo­tıv­terdi óndirip, olardy Eýrazııalyq eko­nomıkalyq odaq jáne TMD aýma­ǵyn­daǵy Ázerbaıjan men О́zbekstan sekil­di kórshiles elderden bastap, búkil álem­ge eksporttaıtyn halyqaralyq óndiris retinde tanylmaq. – EQZ zaýytyndaǵy úlesti ulǵaıtý jáne jańa óndiristi bastaý Alstom konserniniń Qazaqstanda birizdilikpen júzege asyryp jatqan strategııa­sy aıasyndaǵy zańdy qadam bolyp ta­by­lady. Bizdiń maqsatymyz – Qazaq­stan Respýblıkasymen senimdi ári uzaq merzimdi seriktestik qurý. Tehno­logııa­lar men óndiristi jergiliktendirý, jańa jumys oryndaryn qurý jáne jergilikti mamandardy oqytý arqyly Alstom Qazaqstandaǵy mashına jasaý­shy basty kásiporyndardyń birin jańa deńgeıge kóterip, onyń aldynda álemdik naryqtyń esigin ashpaq. Biz qazirdiń ózinde el aýmaǵynda 400-den asa jumys ornyn quryp úlgerdik, óndiristi jergiliktendirýdiń úlesi 28 paıyzǵa jetip otyr jáne de taıaýdaǵy 2 jyl ishinde ol 50 paıyzǵa deıin artpaq. Qazaqstan Úkimetiniń ınvestısııalaýǵa jáne damytýǵa arnap jasap bergen qolaıly jaǵdaılary aıasynda bizdiń yntymaqtastyǵymyz barlyq múddeli taraptarǵa óz paıdasyn ákeletinine men nyq senimdimin, dedi Alstom konserniniń Reseı jáne TMD aımaǵyndaǵy aǵa vıse-prezıdenti Martın Vojýr. Saltanatty sharadan keıin kásip­orynnyń kommersııalyq dırektory Alekseı Ershov jýrnalısterge zaýyt ishin aralatty. Ol ár sehtyń atqa­ratyn jumystarymen tanystyryp, elektrovozdardyń burynǵylardan artyqshylyqtaryna toqtaldy. «Kórip ­otyrǵan KZ8A júk elektrovozy álem­degi eń qýatty ári tıimdi mashına bolyp sanalady. Munyń burynǵylardan artyqshylyǵy tek qýatynda ǵana emes, ár tusta únemdeýge negizdelip jasal­ǵan elektrovoz buǵan deıingi temir­jol mashınalarynan elektr qýa­tyn 25 paıyzǵa deıin az jumsaıdy. Sondaı-aq, jyldamdyǵy da joǵary. Mashı­nısterge qolaıly bolýy úshin kabı­nalar úzdik úlgide jasalǵan. Onda tońa­zytqyshtan bastap mıkrotolqyndy pesh jáne shaı qaınatyp ishetin elektr shaınekke deıin bar», dedi A.Ershov. Onyń sózine qaraǵanda, qazaqstan­dyq elektrovozdardy alýǵa qazirdiń ózinde Ázerbaıjan eli tapsyrys be­rip qoıǵan. Munymen birge, taıaýda ǵana ýkraın temirjolynyń basshylarymen Eýropa elinde kezdeskenderin aıtty. Búginde elektrovoz parkteriniń tozyǵy 90 paıyzǵa taıaǵan ýkraın temirjolshylary da qazaqstandyq elektrovozǵa qatty qyzyǵýshylyq tany­typ otyrǵan kórinedi. «Ýkraınalyq áriptesterimizdiń bizdiń elektrovozǵa tapsyrys beretinine kúmánimiz joq. Sebebi, Eýrazııa keńistiginde eń tıimdi dep sanalatyn osy zaýyt bizde ǵana bar. Oǵan qosa, bizdiń zaýyt olardyń talabyn oryndap, sapa boıynsha qalaýyn qanaǵattandyrýǵa tolyq qabiletti», dedi kommersııalyq dırektor. Zaýyttyń jumysymen tanys­qan jýr­nalısterdi eksportqa shyǵa­rylatyn elektrovozdardyń baǵasy da qyzyqtyrdy. «Júk elektrovozdarynyń baǵasy 6 myń eýro bolady. Keleshekte otandyq ónimniń úlesi artyp, 70 paıyzǵa jýyqtaǵanda bálkim baǵa shamaly arzandaýy da yqtımal. Negizi naqty tapsyrystar kelip tursa, zaýyt bir aptada bir elektrovoz qurastyryp shyǵarýǵa qabiletti. Buǵan qosa, aldaǵy ýaqytta qazaqstandyq úles 50 paıyzdan artqan kezde qurastyrylǵan elektrovozdarǵa «Qazaqstanda jasalǵan» degen logotıpter japsyrylatyn bolady. Buıyrtsa, bul maqsatqa 2020 jyly qol jetkizemiz degen úmitimiz bar», dedi ol. Nurbaı ELMURATOV, «Egemen Qazaqstan».