Atyraýda kólikpen adam basqan azamat qamaýǵa alyndy

ATYRAÝ. 29 aqpan. Atyraý qalalyq №2 soty saýnany paıdalanǵany úshin qyzmet aqysyn tólemeı búlik shyǵaryp, keıin mas kúıinde avtokólikpen adamdy basqan azamatty qamaýǵa aldy. Bul týraly oblystyq sottyń baspasóz qyzmeti habarlady. «Tergeý deregine sáıkes, búlik shyǵarýshy óziniń týysymen birge Atyraý qalasyndaǵy saýnalardyń birine kelgen. Shyǵar kezde ol saýnanyń qyzmeti úshin aqy tóleýden bas tartady. Qyzmetkerlerdiń sózderine qulaq aspaı, ashýlanyp, balaǵattaıdy. Aqsha tóleýdiń ornyna mas júrgizýshi óz kóligine otyryp, artqa shegingen kezde óz týysyn basyp ketken. Sodan soń, ashýǵa erik bergen «qonaq» saýna qyzmetkerlerin kólikpen qýady. Shataq shyǵarýshy olardyń birin qaǵyp, ony kólikpen 10-15 metr jerge súıreıdi. Birneshe ret jábirlenýshiniń ústinen tapap ótken. Artynsha oqıǵa bolǵan jerden boı tasalaıdy. Nátıjesinde jábirlenýshi alǵan aýyr dene jaraqattarynyń áserinen aýrýhanada kóz jumǵan», – dep habarlady Atyraý sotynyń baspasóz hatshysy Boranbaı Ǵalıev. Baspasóz málimdemesinde aıtylǵandaı, qazirgi ýaqytta búlik shyǵarýshyǵa qatysty Qylmystyq kodekstiń 106-babynyń 3-bólimimen qylmystyq is qozǵalyp, sotpen eki aı merzimge «kúzetpen ustaý» túrindegi bultarpaý sharasyna sanksııa berildi. Qazirgi tańda tergeý amaldary jalǵasýda. Joldasbek Shópeǵul. Derek: Atyraý oblystyq sotynyń baspasóz qyzmeti. Sýret: aif.ru.