Qaraǵandyda dzıýdodan álem chempıonatynyń júldegeri ustaldy

QARAǴANDY. 29 aqpan. Qaraǵandyda býkmekerlik keńselerge birneshe ret qaraqshylyq shabýyl jasaǵan kúdiktiler qolǵa tústi. Bul týraly oblystyq ishki ister departamentiniń baspasóz qyzmetine silteme jasaǵan egemen.kz tilshisi habarlady. Vedomstvonyń baspasóz qyzmetiniń aqparatyna sáıkes, qaraqshylyq shabýyldarǵa qatysy bar eki kúdikti ustalǵan. Olardyń biri – 24 jastaǵy halyqaralyq dárejedegi sport sheberi, dzıýdodan jasóspirimder arasyndaǵy álem chempıonatynyń júldegeri bolsa, ekinshisi 27 jastaǵy jumyssyz er adam. Kúdiktiler betperde kıip, býkmekerlik keńselerdiń qyzmetkerlerin qarýmen qorqytyp, aqshany tartyp alǵannan keıin, oqıǵa ornynan boı tasalap otyrǵan. «Eki kúdikti de bes ret qaraqshylyq shabýyl jasaǵandaryn moıyndaryna aldy. Zattaı aıǵaqtar alynyp, olardyń osyndaı basqa qylmysqa qatystylyqtarynyń bar-joǵy tekserilýde. Ustalǵandar ýaqytsha ustaý oqshaýlaǵyshyna qamaldy, sotqa deıingi tergeý amaldary júrgizilýde», – dep habarlady oblystyq ishki ister deparatamentniń baspasóz qyzmeti. Qaırat Ábildınov. Derek: Qaraǵandy oblystyq ishki ister departamentiniń baspasóz qyzmeti. Sýret: nur.kz.