«Astana arlandary» syrt alańda «Baký faırstan» basym tústi

ASTANA. 4 naýryz. Búgin Búkilálemdik boks serııasynda (WSB) el namysyn qorǵaıtyn «Astana arlandary» Ázerbaıjan astanasy – Baký qalasynda jergilikti «Baký faırs» komandasymen kezdesip, 3:2 esebimen basym tústi. Bul týraly egemen.kz tilshisi habarlady. Alǵash bolyp sharshy alańǵa 52 kılo salmaq dárejesindegi boksshylar kóterildi. «Arlandar» sapynan Oljas Sáttibaev synǵa tússe, qarsylas tarap Magomed Ibıevke senim artty. Tartysty jekpe-jek nátıjesinde qazaqstandyq 3:0 esebimen jeńiske jetti. Oljastyń jeńisti jolyn 60 kıloda baq synaǵan otandasymyz Zákir Safıýllın jalǵastyrdy. Ol sharshy alańda Nasraddın Mamedovten 3:0 esebimen basym túsken bolatyn. Alaıda, kelesi jekpe-jekte, ıaǵnı, 69 kıloda ázerbaıjandar ese qaıtara bildi. Atap aıtqanda, «Baký faırs» boksshysy Tamerlan Abdýllaev bizdiń Aslanbek Shymbergenovti 2:0 esebimen jeńdi. Jalpy, bul aıqastyń asa tartysty ótkenin atap ótken jón. Nátıjesinde qaptaldaǵy tóreshilerdiń ekeýi jeńisti ázerbaıjanǵa berse, bir qazy teń esepti tirkedi. Kelesi 81 kılo salmaqtaǵy jekpe-jekte jankúıerler sharshy alań ıesi Mıhaıl Daýhalıaves pen qazaqstandyq Nurdáýlet Jarmanovtyń aıqasyn tamashalady. Qarsylasyna qaraǵanda basym bolǵan qazaq boksshysy ýaqyt ótken saıyn shabýylyn kúsheıtti. Bul qarqyn óz jemisin berip, tóreshiler úshinshi raýndta Jarmanovtyń paıdasyna tehnıkalyq nokaýtty tirkedi. Osylaısha, Nurdáýlet «Arlandarǵa» bul kezdesýdegi jeńisti alyp berdi. Al sońǵy kezdesýde asa aýyr salmaqtaǵy (+91 kg) boksshylar judyryqtasty. Bul joly «Baký faırstyń» alyby Arslanbek Mahmýdov bizdiń Nurjan Bekzatovtan aılasyn asyryp ketti. Aıtarlyqtaı qarsylasyp baqqan Nurjan sońǵy – besinshi raýndta nokdaýnǵa tústi. Aýyr soqqydan keıin ol esin jıǵanymen, tóreshiler jekpe-jekti toqtatyp, ázerbaıjannyń qolyn kóterdi. «Baký faırs» (Baký, Ázerbaıjan) – «Astana arlandary» (Astana, Qazaqstan) 2:3 52 kg: Magomed Ibıev  – Oljas Sáttibaev 0:3 (45:50, 44:50, 45:50) 60 kg: Nasraddın Mamedov – Zákir Safıýllın 0:3 (45:49, 44:49, 45:49) 69 kg: Tamerlan Abdýllaev – Aslanbek Shymbergenov 2:0 (47:47, 48:46, 48:46) 81 kg: Mıhaıl Daýhalıaves – Nurdáýlet Jarmanov TKO R3 +91 kg: Arslanbek Mahmýdov – Nurjan Bekzatov TKO R5 Elaman Qońyr. Derek: egemen.kz. Sýret: worldseriesboxing.com.