Semınar-trenıngke senim úlken

Keshe Astana qalasy boıynsha saılaýdy baıqaýǵa járdemdesý óńirlik ortalyǵy «Baıqaýshylardyń quqyqtary men mindetteri. Qazaqstan Respýblıkasy Parlamenti Májilisi men máslıhattar depýtattarynyń saılaýlaryndaǵy baıqaýshylar qyzmetindegi ádister men tásilder» taqyrybynda semınar-trenıng ótkizdi. Semınar-trenıng barysynda qoǵamdyq baıqaý salasyndaǵy sarapshy L.N.Gýmılev atyndaǵy Eýrazııa ulttyq ýnıversıteti saıasattaný kafedrasy professorynyń min­detin atqarýshy, saıası ǵylymdar kandıdaty Iýlııa Onýchko saılaý úderisindegi baıqaýshylardyń róli jóninde baıandama jasady. Baıandamashy baıqaýshy tulǵasyna jan-jaqty túsinikteme bere kelip, onyń atqaratyn qyzmetine jan-jaqty toqtaldy. Saılaý kúngi úderiske baıqaýshylar ári baqylaýshy, ári kýáger retinde qatysatyndyǵyn tilge tıek etti. Baıqaýshylar óz kezeginde saılaýdyń obek­tıvti, ádiletti jáne adal ótýine atsalysýy qajet. Kerek deseńiz, saılaýdyń zańǵa sáıkes ashyq, ádiletti ótýi baıqaýshylarǵa da baılanysty bolmaqshy. Iаǵnı, baıqaýshylar saılaý úderisiniń birtutastyǵyn qamtamasyz etedi. Semınar-trenıng kezinde baıqaýshylar­dyń biliktiligin arttyrýǵa baılanysty máseleler kóbirek qozǵalyp, jıynǵa qaty­sýshylardyń kókeıindegi sansyz saýalǵa jaý­ap berýmen túıindeldi. Jıynda sóz alǵan baıandamashylar da oǵan qatysýshylardyń nazaryn saılaýdyń ashyq jáne zań nor­­malaryna sáıkes ótkizilýine, qoǵamdyq baıqaýshylar ınstıtýtynyń róline aýdardy. Sonymen qatar, atalǵan shara barysynda baıqaýshylardyń ókilettikteri, quqyqtary men mindetteri jan-jaqty talqylandy dese de bolady. Semınar-trenıngtiń utymdylyǵy da osy tusta kórindi. Saılaýdy baıqaý úderisine daıyndyq aıasynda Saılaýdy baıqaý jónindegi res­pýblıkalyq qoǵamdyq komıssııa (SBRQK) elordalyq baıqaýshylar úshin uıym­das­tyrylǵan sharaǵa SBRQK músheleri jáne Astana qalasy boıynsha saılaýdy baqylaýǵa járdemdesý óńirlik ortalyǵynyń qyzmetkerleri qatysty. Astana qalasy boıynsha saılaýdy ba­qylaýǵa járdemdesý óńirlik ortalyǵynyń basshysy Jumaǵalı Arystan ótkizilip jatqan semınar-trenıngke qatysty óz pikirin tómendegishe bildirdi: – Astanada 170 saılaý ýchaskesi bar, ıaǵnı árbir ýchaskeden bir-bir baıqaýshydan saılaý kúni 170 baıqaýshy qyzmet etedi degen sóz. Búgingi semınar-trenıngke qatysqan baıqaýshylar solardyń qatarynda bolady. Búgingi kúnge deıin 100 baıqaýshy semınar barysynda taǵylymdamadan ótti. Olar osyndaı jıyn barysynda alǵan bilimi men biligin saılaý kúni is júzinde kórsetetin bolady, – dedi ol. Ǵabıt ISKENDERULY, «Egemen Qazaqstan».