Maqsat – asa sapaly ónimder shyǵarý

Keshe Qazaqstannyń Kommýnıstik halyq partııasy (QKHP) saıası uıymy atynan Parlament Májilisiniń depýtattyǵynan úmitker retinde tizimge engizilgen belsendiler Oral qalasyndaǵy «Oral quıý-mehanıkalyq zaýyty» JShS ujymynda bolyp, ózderiniń saılaýaldy úgit-nasıhat jumystaryn júrgizdi. Shoıyn, qurysh, qoladan ónim jasaıtyn zaýyttyń sheber qoldar jınalǵan úlken ujymy Kommýnıstik partııanyń kóshbasshysy Vladıslav Kosarev bastaǵan qonaqtardy qyzý qarsy aldy. Partııa kóshbasshysy jınalǵandarǵa ózderiniń saılaýaldy baǵdarlamasyn aıtyp berýmen qatar, kommýnıstik ıdeologııanyń árqashan da jumysshy tabynyń janashyry ekenin aıtty. Biz eńbek adamynyń múddesin qorǵaýǵa árqashan da daıynbyz. Sony­men qatar, búgingi tańda sizderdiń ónim­derińiz joǵary tehnologııamen shyqsa ǵana naryqta básekelestikke qabilet­ti bola alatynyn umytpańyzdar. Sondyq­tan osy baǵytta jumys isteý – árbir eńbek ujy­mynyń mindeti. Búgingi kúni Úki­met osy baǵytty ustanyp, qazir qazaq­standyq ónimderdiń álemdik arenaǵa shy­ǵyp jatqanyn kórip júrmiz, – dedi V.Kosarev. Odan ári ol atalmysh zaýyt ónimderi­niń Qazaqstanǵa birshama tanymal ekenin atap ótti. О́ziniń de onyń ónimderin jaqsy biletinin aıtty. Otandyq ekonomıkanyń damýy men qorǵalýynda qazaqstandyq segmentterdiń ónim qura­mynda basym bolǵandyǵy mańyzdy ról atqarady. Sizderdiń ónimderińizdiń osy talaptardyń údesinen tabylyp júrgeni qýanyshty. Elimizde osyndaı kásiporyndar kóp bolýy kerek, dedi halyqtyq kommýnısterdiń kóshbasshysy. Bul sózderge zaýyt jumysshylary rızashylyǵyn bildirip, qýana qol soqty. Jınalǵandar aldynda QKHP Batys Qazaqstan oblystyq fılıalynyń jetekshisi Súıinǵalı Jarylǵasynov ta sóz sóılep, partııanyń saılaýaldy baǵdarlamasyndaǵy jumysshy tabynyń múddesin joqtaıtyn tustaryn qaıtalap ótti. Eńbek – adamzat úshin eń basty qundylyq, al eńbek adamyn joǵary baǵalaý kommýnıstik partııanyń ǵana qolynan keledi. Kapıtalıstik qoǵamdyq qatynasta jumysshynyń múddesi aıaqqa basylady, onyń eńbegi joǵary baǵalanbaıdy. Sondyqtan da eńbek pen kapıtaldyń qaıshylyǵy tereńdep barady. Búgingi tańda álemde bolyp jatqan ekonomıkalyq daǵdarystyń túp-tamyry osynda, dedi S.Jarylǵasynov. Kezdesý sońynda qonaqtar jınal­ǵan­dardyń kóptegen suraqtaryna jaýap berdi jáne ózderiniń saılaýaldy baǵdar­lamasyn qoldaýǵa shaqyrdy. Sonymen birge, V.Kosarev zaýyttyń áıelder qaýymyn Halyqaralyq áıelder kúnimen quttyqtady. Jaqsybaı SAMRAT, «Egemen Qazaqstan». Batys Qazaqstan oblysy.