«Bosańsý – bizge jat...»

– deıdi Almaty qalasy IID resmı ókili, polısııa maıory Saltanat ÁZIRBEK – Saltanat, elimizdegi eń úl­ken qalanyń qylmys ále­miniń bar málimetin aınadan qara­ǵandaı etip qolyńyzda ustap otyrsyz. Sondaılyq názik jan buǵan qalaı beıimdeldi, qalaı keldi, áńgimeni sodan bastasaq?! – Balabaqshada ul balalar ushqyshtyń kıimin kıip, qyz balalar qoldaryna qýyrshaq ustap sýretke túsetin dástúr bolǵan. «Men qýyrshaq ustamaımyn, ushqyshtyń kıimin kıemin...» dep alǵash shý shyǵarǵan men ekenmin. Osy meniń ómirlik armanymnyń bastamasy bolǵan sekildi. Zań akademııasynyń tergeý-krımınalıstıka fakýltetin bitirdim. Polısııadan oryn tabylmasyn sezip, «Ońtústik Astana» telearnasynda «Qylmys hronıkasy» baǵdarlamasyna jumysqa turdym. Oqýdy bitirip 2003 jyldyń mamyr aıynda alǵash ret polısııa kıim úlgisin kıip sapqa turdym. Qazirgi mınıstrimiz Qasymov myrza meniń osy baǵytqa beıim ekenimdi baıqasa kerek, búgingi qyzmetime aldyrdy. – Qazir kez kelgen qylmys­tyq oqıǵa aldymen ınternetten kórinis tabady. Sonyń aqyrynda, jasyratyn nesi bar, BAQ ókilderi Saltanat Ázir­bektiń aqyrǵy málimetin taǵat­syzdana tosady... –Resmı málimet qaı kezde de aýadaı qajet. Ásirese, quqyq salasynda. Áleýmettik jeliler bizge bir jaǵynan qylmysqa qatysty tez qulaǵdar bolýymyz úshin kómegin de tıgizedi, ekinshi jaǵynan – eldi dúrliktirgendeı bolyp jumysymyzdy kúrdelendirip jiberedi. Sońǵy kezde jalǵan aqparattardy jarııalaý jıilep ketti. Kópshilik 2015 jyldyń 1 qańtarynan bastap QR Qylmystyq ko­deksinde ol úshin qatań jazalanatynyn bilmeıdi. Bizde ony taldaıtyn, monıtorıng jasaıtyn bólim bar. Tek sońǵy málimetter taratamyz. –Taǵy da ınternet... polısııa­ny shalyp qulatyp, jaǵasyn julyp-jyrtyp jatqandar áleýmettik jelilerde kórsetildi. Bul kórinisterden syrttaı baqy­lap ne uǵynamyz – polı­sııa­nyń qaýqarsyzdyǵy ma, álde Zańnyń shekteýi me? –Zań boıynsha polısııa qyzmetkeri tek kúsh qana emes, tapanshasyn da qoldana alady. Biraq, belgili sebepterge baılanysty oǵan jol bermeıdi. Keıde qyzmetkerlerimizge toq­paqty qabyldap, betin tyrnap, ıyǵynan julqylap jatqan qyz-kelinshekterdiń dórekiligin kó­terýine týra keledi. О́rkenıet jolyndamyz ǵoı... – Tapansha demekshi, sizdiń mergendigińiz týraly súısine aıtatyn áriptesterińiz kóp... – Iá...Tapanshadan atýdan men tek «bes» degen baǵa alamyn! Úsh oq, kórsetkish – 30 bolsa, meniń mejem – 27-den eshýaqytta kem túsken emes. Qolym qalt et­kende kásibı tırge barýdy umyt­paımyn... – Tamasha, quttyqtaımyn... Siz Qazaqstannyń barlyq bury­shyna óte bir tanymal jansyz. Jaı ómirde tanymaldyqtyń paıdasy tıip kórdi me? – Árıne, teledıdar arqyly! Meniń ózimniń baıqaýymsha, halyq krımınaldy derekterdi qalt jibermeıdi... Keıde kólikte jyly júzben bas ızesip jatatyndar, dúkenge barǵanda sálem berip, bazarda zatyn arzandatyp usynyp uıaltatyndar bar... Rahmetimdi aıtamyn. Ystyq yqy­las janyńa jaǵymdy áser etedi. Jaýapkershilikti eseleı túsesiń... – Bir saýal bar, jón dep tap­pasańyz jaýap bermeýińizge bolady. Sizdiń kóptegen kórer­menderińizden áldeneshe ret esti­genim: «Saltanat buryn tolyq edi... qazir Gollıvýdtyń aktrısasyndaı, qýyrshaqtaı bolyp qaldy. Ne boldy, aýyrmaı ma?» degen sózder... – Iá, ıá... Bul suraqty maǵan da jıi qoıady. Allaǵa shúkir, aýrýdan saýmyn. Oılana kelip, ózim osyndaı qadam jasadym... Júıeli sport jattyǵýynyń paıdasy. Tamaqtaný mázirimdi de ózgerttim. Sport, sport, sport... – Balalar demekshi... Otba­syńyz týraly aıtyńyzshy? – Alla bergen 7 jasar qyzym, 6 jasar ulym bar. Kúıeýim bárimiz ata-enemniń qolynda turamyz. Qoldap otyrady. Shymkentte turatyn anam – Oqý isiniń úzdigi, únemi kelip-ketip, jelep-jebep júredi... Áńgimelesken Talǵat SÚIINBAI, «Egemen Qazaqstan». ALMATY. Sýretti túsirgen IýRII BEKKER.