ASTANA. 5 naýryz. Qorǵanys mınıstriniń orynbasarlary halyqaralyq 8 naýryz áıelder kúnine oraı áskerı qyz-kelinshekteri úshin konsert uıymdastyrdy. Bul týraly egemen.kz tilshisi habarlady.
«21 ǵasyrda áıel áskerı qyzmetshi nemese sarbaz áıeldiń bolýy eshkimdi tańǵaldyrmaıdy. Elbasy – Joǵary Bas Qolbasshynyń sózimen aıtsaq, «búginde er-azamattar sııaqty áıelder de pogon taǵýǵa teń quqyly», dep Qorǵanys mınıstri Imanǵalı Tasmaǵambetov áskerı qyz-kelinshekterge jyly lebizin bildirdi.
Merekelik konsert áıel áskerı qyzmetshilerdi shattyqqa bólep, kóńilin bir kóterip tastady. Birde-bir kórermen bul merekede nazardan tys qalmady. Olarǵa gúl shoqtary tartý etilip, aıaýly arýlarǵa arnap arnaıy shyǵarylǵan án oryndaldy, al jasulandyqtar qyz-kelinshekterdi bıge shaqyrdy.
Alaıda, konserttiń eń basty tosynsyıy Qorǵanys mınıstri orynbasarlarynyń kórsetken ónerleri boldy. General-leıtenant Oqas Saparov pen Nurlan Saýranbaev lırıkalyq ánder oryndasa, general-maıor Talǵat Muhtarov sahnada teatrlandyrylǵan qoıylym kórsetip, barlyq zaldy tánti etti.
Dastan Kenjalın.
Derek, sýret: egemen.kz
