Anglııada jankúıer ermek úshin báske 20 fýnt tigip, 29 myń utyp aldy

ASTANA. 6 naýryz. Fýtboldan Aǵylshyn premer-lıgasynda oınaıtyn «Lester» komandasynyń jankúıeri súıikti klýbyna 20 fýnt sterlıng bás tigip, 29 myń fýnt sterlıng (40890 AQSh dollary) utyp aldy. Bul týraly eurosport.ru portalyna silteme jasaǵan egemen.kz tilshisi habarlady. Djon Praık esimdi jankúıer maýsym basynda «Lesterdiń» chempıondyǵyna 20 fýnt sterlıng bás tikken eken. Búginde 29 týrdan keıin týrnır kestesinde 1-orynda kele jatqan bul komandany ol kezde eshkim mundaı joǵary nátıje kórsetedi dep oılaǵan joq. Sol sebepti de, onyń chempıondyǵyna býkmekerlik keńseler 5001 koeffısıent bergen. Soǵan oraı, Djon Praıktyń negizgi utysy 100 myń fýnt sterlıng bolýy tıis-tin. Alaıda, ol úshin maýsym sońyna deıin kútýi kerek. Oǵan shydamy jetpegen jankúıer býkmekerlik keńsemen kelisimge keldi. Goal.com portalyna bergen suhbatynda Djon Praık: «Maýsym basynda ermek úshin ǵana bás tigip edim. Biraq ár týr saıyn komandany emes, utys jaıynda jıi oılaı bastadym. Oǵan «Lesterdiń» oıyny áser etkenin sózsiz. Al 28-týrdyń aldynda shydamym taýsylyp, býkmekerlik keńse qyzmetkerlerinen aqshany qazir alsam, qolyma qansha soma tıetinin suradym. Olar 16 myń fýnt sterlıng ekenin aıtqanda, azsynyp, bas tarttym. Al sol týrda súıikti komandamnyń chempıondyqqa talastaǵy basty qarsylastary «Tottenhem» men «Arsenal» jeńilis tapty. Osydan keıin meniń utysym birden 29 myńǵa kóterildi. Onyń ústine, býkmekerler maýsym aıaqtalǵansha meniń básimnen budan joǵary utys bolmaıtynyn aıtty. Sondyqtan esh oılanbastan aqshany alýdy uıǵardym. 20 fýnt tigip, osynsha aqsha utý jaman emes dep oılaımyn. Eger sońyna deıin kútip, nátıje men oılaǵandaı bolmaı shyqsa, dymsyz qalar edim. Tipti ol kezdegi jaǵdaıymnyń qalaı bolaryn elestete almaımyn. Al qazir qolyma aqshany alǵannan keıin kóńil-kúıimde burynǵydaı alańdaýshylyq joq. Endi súıikti komandama esh alańsyz jankúıer bolyp, fýtboldan rahat alamyn», – dedi. Sonymen qatar, ol maýsymnyń ortasynda «Lesterdiń» chempıondyǵyna taǵy 10 fýnt sterlıng tikkenin aıtty. Biraq, ol kezdegi koeffısıent 400 bolǵan eken. Eger Klaýdıo Ranerıdiń shákirtteri chempıon atansa, Djon Praık taǵy 4 myń fýnt sterlıng aqsha utady. Aıta keteıik, búginge deıin Aǵylshyn premer-lıgasynyń 29 týry ótti. Sonyń nátıjesi boıynsha «Lester» 60 upaımen kósh bastap tur. Al ekinshi oryndaǵy «Tottenhemde» 55 upaı bolsa, ázirge úshinshi satyda kele jatqan «Arsenalda» 52 upaı bar. Taǵy bir nazar aýdaratyn jaıt, eger «Lester» chempıon bolsa, birqatar býkmekerlik keńseler aıtarlyqtaı shyǵynǵa batatyn túri bar. Máselen, bir ǵana Sky Bet keńsesi 5,5 mln. fýnt sterlıngti «Lesterge» senim artqan jankúıerlerge taratyp beredi. Elaman Qońyr. Derek: eurosport.ru. Sýret: AFP.