Germanııada elimizdiń azamattary úshin saılaý bólimsheleri ashylady

ASTANA. 9 naýryz. Germanııada 20 naýryz kúni eki saılaý bólimshesi ashylady. Bul týraly 24.kz-ke silteme jasaǵan egemen.kz tilshisi habarlady. Elimizdegi Parlament Májilisiniń depýtattaryn saılaý kezinde el azamattary óz daýystaryn Berlın men Maındegi Frankfýrt qalalarynda bere alady. Mundaǵy bólimshelerge barlyǵy 400 adam keledi dep josparlanǵan. Olardyń arasynda elshilik qyzmetkerleri men shet memlekette turyp jatqan stýdentter bar. Jalpy, Berlındegi saılaý komıssııasynyń músheleri anyqtaldy. Al búginde saılaýshylar tizimi jasaqtalyp jatyr. Komıssııa tóraǵasy Dáýren Káripovtiń habarlaýynsha, nemis jerinde Qazaqstanda ótetin saılaý jaıly nasıhat pen ondaǵy baýyrlarymyzdy aqparattandyrý jumystary belsendi atqarylýda. Sondaı-aq, ol «Bizdiń konsýldyq bólimniń qyzmetkerleri men bas konsýldyqtyń qyzmetkerleri konsýldyq tirkeýde turǵan azamattarǵa habarlasyp, 20 naýryzda saılaý týraly habardar etip otyr. Elshilik saıtyna aıdar paraqshasyn ornattyq. Ol eki bólimnen turady. Birinshisinde saılaý bolatyndyǵy týraly habarlama ildik, ekinshisinde kúndelikti saılaýǵa qatysty aqparattar ornatylady. Bul málimetter kúnde jańartylyp turady», – dedi. Aıta keteıik, shet eldegi Qazaqstannyń azamattary 20 naýryzda ótetin saılaýǵa qatysýǵa belsendi bolyp otyr. Talǵat Raıymbek. Derek, sýret: 24.kz.