Ulttyq Olımpıadalyq komıtet pen «Qazaqstan» RTRK memorandým jasasty

ASTANA. 9 naýryz. Mádenıet jáne sport mınıstri Arystanbek Muhamedıuly, Ulttyq Olımpıadalyq komıtetiniń bas hatshysy Danııar Ábilǵazın jáne «Qazaqstan» RTRK» AQ basqarma tóraıymy Nurjan Muhamedjanova halyq arasynda sportty damytý men ilgeriletý jónindegi úshjaqty memorandýmǵa qol qoıdy. Bul týraly egemen.kz tilshisi habarlady. Memorandým sheńberinde Qazaqstan Respýblıkasynda dene shynyqtyrý men sportty, salamatty ómir saltyn damytýǵa arnalǵan jumystardy birigip jasaý, elimizde sportty damytý, olımpıadalyq qozǵalysty, buqaralyq sporttyq is-sharalardy televıdenıede nasıhattaý arqyly damytý josparlanyp otyr. Sonymen birge basym baǵyt retinde elimizdiń olımpıadalyq sport túrlerinen ulttyq qurama komandalaryna basa nazar aýdarylmaq. Memorandýmda sportshylardyń televızııalyq jobalarǵa, saraptamalyq baǵdarlamalar, jańalyq sıýjetterine qatysýyn qamtamasyz etý qarastyryldy. «Kazsport» telearnasynda jańadan arnaıy baǵdarlamalar (otbasylyq, saýyqtyrý) ashý kózdelgen. Sondaı-aq áriptestik memorandýmyna sáıkes «Qazaqstan» RTRK AQ mınıstrlik nemese UOK ótkizetin sporttyq sharalardyń basty aqparattyq seriktesi bolady. Dastan Kenjalın. Derek: «Qazaqstan» RTRK Sýret: egemen.kz