Prezıdent Pavlodarda stýdentter jataqhanasyna bardy

ASTANA. 16 naýryz. Memleket basshysy Pavlodar memlekettik pedagogıkalyq ınstıtýty jataqhanasynyń jańa ǵımaratyna bardy. Bul týraly akorda.kz habarlady. Elbasy ǵımaratty aralap kórip, onda turyp jatqan, «Serpin-2050» baǵdarlamasy boıynsha oqıtyn stýdenttermen áńgimelesti. Qazaqstan Prezıdenti jataqhanada kúndelikti turmys pen demalys úshin barlyq jaǵdaı jasalǵanyn aıtty. Soǵan oraı Nursultan Nazarbaev respýblıkada jastardy qoldaý men olardyń bilim alýy máselelerine udaıy kóńil bólinetinin, sonyń ishinde bul jumys «Serpin-2050» memlekettik baǵdarlamasy aıasynda da atqarylyp jatqanyn atap kórsetti. 500 adamǵa arnalǵan páter úlgisindegi jataqhana 2015 jyly ashylǵan. Onda «Serpin» baǵdarlamasy boıynsha oqıtyn 300 stýdent turady. Ǵımaratta demalýǵa arnalǵan bólmeler, medısına kabıneti, jattyǵý zaly, jeke zattardy saqtaıtyn qoıma, tehnıkalyq orynjaılar jáne múmkindigi shekteýli stýdentter úshin arnaıy jabdyqtalǵan bólmeler bar. Elaman Qońyr. Derek, sýret: akorda.kz.