• 17 Naýryz, 2016

«Barselona» men «Bavarııa» shırek fınalǵa shyqty (vıdeo)

352 ret

kórsetildi

2 mın

oqý úshin

Egemen Qazaqstan

ASTANA. 17 naýryz. Sársenbiden beısenbige qaraǵan túni ÝEFA Chempıondar lıgasynyń shırek fınalyna shyqqan taǵy eki komanda anyqtaldy. Qarymta kezdesýde óz alańdarynda jeńiske jetken Ispanııanyń «Barselonasy» men Germanııanyń «Bavarııa» komandalary jarystyń kelesi kezeńine ótti. Bul týraly egemen.kz tilshisi habarlady. «Barselona» (Barselona, Ispanııa) – «Arsenal» (London, Anglııa) 3:1 (2:0) Goldar: Neımar 18, Sýares 65, Messı 88 – El-Nenı 51. Alań ıeleri alǵashqy oıynda qajetti nátıjege qol jetkizgenimen, bul kezdesýde de baryn saldy. Kezekti shabýyldardyń birinde Neımardyń kómegimen ıspanııalyq klýb alǵash bolyp esep ashty. «Arsenal» komandasynyń oıynshylary qansha tyryssa da, alǵashqy 45 mınýtta qarymta gol soǵa almady. Al matchtyń ekinshi jartysynda qonaqtar sapynan El-Nenı tarazy basyn teńestirip, jankúıerlerine úmit syılaǵan edi. Degenmen, araǵa kóp ýaqyt salmaı, «Barselonanyń» ortalyq shabýylshysy Lýıs Sýares mergendigimen kózge túsip, komandasyn alǵa shyǵardy. Oıynnyń aıaqtalar tusynda Lıonel Messı úshinshi goldy soǵyp, kezdesýdiń núktesin qoıdy. «Bavarııa» (Mıýnhen, Germanııa) – «Iýventýs» (Týrın, Italııa) 4:2 (2:2) Goldar: Levandovskı 73, Mıýller 90+1, Alkantara 108, Koman 110 – Pogba 5, Kýadrado 28 Mıýnhendegi «Alıans Arena» stadıonynda jankúıerler naǵyz tartysty básekeni tamashalady. «Iýventýs» komandasy oıyn bastala sala, júıeli oınap, shabýylǵa qatty mán berdi. Osyndaı shabýyldardyń sońy Pol Pogba men Kýadradonyń gol soǵýymen aıaqtaldy. «Bavarııa» qarsylastarynan mundaı oıyndy kútpegen bolsa kerek, qansha qarymta shabýyldar uıymdastyrsa da, birinshi taımda gol soǵa almady. Al ekinshi taım alań ıeleri úshin sátti aıaqtaldy. Aldymen shabýyl shebinde óner kórsetetin Robert Levandovskı esepti qysqartsa, kezdesýdiń sońǵy mınýttarynda Tomas Mıýller tarazy basyn teńestirip, qosymsha eki taım oınaý múmkindigine qol jetkizdi. Matchtyń negizgi ýaqytynda Italııa komandasy favorıt bolyp kóringenimen, overtaım sátsiz aıaqtaldy. Sharshańqyrap qalǵan «Iýventýske» nemis komandasynyń oıynshylary eki birdeı gol soǵyp, shırek fınaldyń joldamasyn ıemdendi. Aıan Ábdýálı. Derek: egemen.kz. Sýret: vk.com.