Elimiz bar tynyshtyqty tý etken

Keshe Tuńǵysh Pre­­zıdent – El­ba­­sy­nyń kitap­hana­synda Qazaq­stan halqy Assam­bleıasy Tóraǵa­synyń oryn­basary – Hatshylyq meńgerýshisi Eraly Toǵjanov pen Rýmynııa Parlamenti Depýtattar palatasy tóraǵasynyń orynbasary Florın Iordakeniń kezdesýi boldy. Kezdesýde Eraly Toǵjanov Assam­bleıa­nyń jumysymen meımandardy tanys­tyra kelip: «Biz qazaqstandyq modeldi BUU minberinen, EQYU-nyń 56 múshesiniń qatysýymen Kopengagen men Varshavada kópshilik nazaryna usyndyq. Jurtshylyq tarapynan qyzyǵýshylyq asa zor. Tek sońǵy jyldyń ózinde bizdiń tájirıbemizdi zerde­legisi kelgen 26 eldiń delegasııasy­men kezdestim. Elbasy Nursultan Nazarbaev elimizdegi birlikti dáripteıtin, onyń oń isterine uıytqy bolatyn Pıra­mı­dany – Beıbitshilik jáne kelisim saraıyn salǵyzdy. Qazir árbir oblys ortalyq­tarynda Dostyq úıleri bar. Onda elimizdegi barlyq etnomádenı birlestikter jumystaryn júrgizedi. Búgingi kúni Qazaqstan aýmaǵynda 920 etnomá­denı birlestik bar. 6 ulttyq teatr, 37 túrli tilde buqaralyq aqparat qura­ly, 192 etnostardyń tilderin úıretetin orta­lyq­tar jumys atqarady», – dep QHA aıasyn­daǵy isterdiń aýqymy óte keń ekenin qonaq­tarǵa jetkizip, qazaq halqynyń ejelden meımandostyǵyn, tynyshtyqty tý etken halyq ekenin aıtty. Ár etnostyń dástúri men mádenıetin saq­taýdyń mańyzyna toqtalǵan Eraly Toǵ­janov búgingi kúni Qazaqstanda 20 myń rýmyn mekendeıtinin, olardyń basym bóligi Qa­raǵandy aımaǵyna qonys­tanǵanyn aıtty. Florın Iordake delegasııa quramymen tanystyryp ótti. Olardyń arasynda Rýmynııa Parlamenti Depýtattar palatasyndaǵy az ulttar máselesi jónindegi parlamenttik toptyń múshesi, Túrik-musylman jáne tatar demokratııalyq partııasynyń múshesi, tatar baýyr Ámet Varol bar eken. Osy sátte: «Qazaq pen tatar bir-birimen kezdeskende «ısánbisiz» degen, ısánbisiz sizben biz aýdarmashysyz-aq túsinisetin shyǵarmyz», – dep meımandardy bir kúldirip aldy E.Toǵjanov. «Bizdiń Rýmynııa Parlamentinde az ulttardyń óz úni bar, ıaǵnı arnaıy kvota arqyly olar depýtat bolyp saılanady. Al meniń Parlamenttegi mindetimniń biri halyqaralyq baılanystarǵa qatysty, sondyqtan da, Qazaqstan men eki aradaǵy qatynastardyń qanatyn keńeıte túsýi, onyń túrli baǵytty – saıası-ekonomıkalyq, gýmanıtarlyq, mádenı salalardy qamtýy mańyzdy. Rýmynııa bul rette Qazaqstan men Eýroodaq arasyndaǵy myqty kópirdiń qyzmetin atqarǵysy keledi», – degen Florın Iordake qazirgi kúni rýmynııalyq óz áriptesteriniń birazy halyqaralyq uıymdar aıasynda jaqynda ótetin saılaýǵa baıqaýshy retinde qatysyp otyrǵanyn da jetkizdi. Kezdesýge qatysýshylar halyqaralyq áriptestik aıasynda QHA men ózara is-qımyl máselesin talqylaı kele, qoǵamdyq kelisim men jalpyulttyq birliktiń qazaqstandyq úlgisine toqtaldy. Bizdiń taraptan QHA músheleri, Parlament Májilisiniń V shaqyrylymynyń depýtattary Ahmet Mýradov, Iýrıı Tımoshenko, «Býkovına» rýmyn mádenı birlestiginiń tóraıymy Aýrıka Dıak sóıledi. F. Iordake Qazaqstannyń etnos­ara­lyq kelisim salasyndaǵy oń tájirıbesin jáne Qazaqstanda júrgizilip otyrǵan beı­bitshilik pen kelisim saıasatyn Rýmy­nııanyń joǵary baǵalaıtynyn jetkizdi. Kezdesý sońynda qos tarap káde­syılar almasty. Anar TО́LEÝHANQYZY, «Egemen Qazaqstan».