Bıjamal apa

Bıjamal Shaǵıeva 1911 jyly Katonqaraǵaı aýda­nynyń Juldyz aýylynda dúnıege kelgen eken. Tór Altaıda tulymshaǵy jelbiregen qyz kúıeýge shyqqanǵa deıin «Ordjonıkıdze» kolhozynda jumys istep, úı ishine kómektesip, bolysyp júredi. 1941 jyly traktor brıgadasyn basqaratyn kúıeýi ásker qataryna shaqyrylady. Osy ómirlik qosaǵy soǵys kezinde, 1942 jyly Astrahan qalasynda habar-osharsyz ketipti. Jas ómiri aýmaly-tókpeli bulǵaq zamanǵa tap kelip, otbasylyq qýanyshyn soǵys typ-tıpyl etse de, qazaq áıeli qaıtpas qajyrmen zamana jeline qarsy tura bilipti. Bıjamal Eńsebaıqyzy eńbek maıdanynda erekshe kózge túsip, kolhozda saýynshy bolyp jumys isteıdi, «О́skemen – Zyrıan» tasjolyn salýǵa qatysady. Bir ul men bir qyz ósirgen áje 1999 jyldan beri О́skemendegi qyzynyń qolynda turady. Búginde 8 nemeresi, 16 shóberesi, 5 shópsheginiń qyzyǵyn kórip otyr. Kóptegen mereıtoılyq medaldarmen marapattalǵan. – Biz qıyn jyldarda kóreshekti kórgen adambyz. Bir kúnge beriletin bir staqan kók sútpen jan saqtadyq. Qudaıǵa shúkir, qazir bala-shaǵamnyń ortasyndamyn. Árdaıym, Elbasy men eldiń amandyǵyn tilep otyramyn! Otanymyz aman bolsa, bári jaqsy bolady, – dedi 105 jasqa kelgen Bıjamal áje. О́skemen qalasynyń ákimi Temirbek Qasymjanov bıyl 105 kóktemin qarsy alyp otyrǵan keıýanany 8 naýryz merekesimen quttyqtaǵan edi. Qala ákimi zeınetkerge gúl shoqtaryn tapsyra otyryp, kóp balaly ana, súıikti áje retinde óskeleń urpaqqa úlgi bolyp, tiri ańyzǵa aınalǵanyn, soǵys jyldary jáne tyńdy ıgerý kezeńinde eńbek maıdanynda shyńdalǵan Bıjamal Eńsebaıqyzynyń Otandy qorǵaý men saqtaýǵa ólsheýsiz úles qosqanyn atap ótken bolatyn. – Búgingi Táýelsiz elde beıbitshilik pen tynyshtyqta ómir súrip otyrǵanymyz – sizdeı atalar men ájelerdiń ar­qasy. Sondyqtan, sizge búgingi urpaqtyń atynan alǵys aıtamyz, – dedi shahar basshysy. Dýman ANASh, «Egemen Qazaqstan». О́SKEMEN.