Sarabdal saıasattyń saltanaty
Keshe Astananyń tórindegi «Saryarqa» velotreginde «Nur Otan» partııasynyń parlamenttik saılaýdaǵy jeńisine arnalǵan «Birlik! Turaqtylyq! Jasampazdyq!» urany aıasynda jeńimpazdar forýmy bolyp ótti.
Keshe erteńgilik Ortalyq saılaý komıssııasy Parlament Májilisi saılaýynyń aldyn ala nátıjelerin jarııa etti. Onyń qorytyndysy boıynsha, «Nur Otan» partııasyna – 82,15, Qazaqstan Kommýnıstik halyq partııasyna – 7,14, Qazaqstannyń «Aq jol» demokratııalyq partııasyna – 7,18, «Birlik» saıası partııasyna – 0,29, Jalpyulttyq sosıal-demokratııalyq partııaǵa – 1,18, «Aýyl» halyqtyq-demokratııalyq patrıottyq partııasyna 2 paıyz saılaýshylardyń daýysy berilgen. Sóıtip, bılik partııasy – «Nur Otannyń» taǵy da jeńiske jetkeninen qalyń jurt habardar boldy.
«Saryarqada» bas qosqan nurotandyq qoldaýshylar naǵyz merekelik kóńil kúıde ekeni kózge uryp turdy. Velotrektiń belin qaıystyrǵan qalyń qaýymnyń jelpinisi jeldeı esedi. Jal-jal tolqyn tárizdi sol jaq sektordan bastalǵan ádemi qımyldy ile-shala basqa sektordaǵylar áserli túrde ilip ala jóneledi. Jalaýshalar ustaǵan jastardyń jigermen atqarylǵan qımyl-áreketiniń áseri sonshalyq, aınalasyndaǵylarǵa da erekshe qýat bitirip, jeńis rýhyn syılaıdy.
Jeńimpazdar forýmynyń tynysy áýeli otandyq estrada ánshileriniń áýezdi áýenderimen aıshyqtaldy. Nurotandyq úmitkerlerdiń sanatynda tizimge engen Qaırat Nurtastyń sahnaǵa shyǵýy partııa qoldaýshylary tarapynan erekshe yqylas týǵyzdy. Astana týraly ánimen jurtshylyqty baýrap aldy. Qaırattan keıin «Rızamyn men» dep án shyrqaǵan Janar Doǵalovanyń ózi de forým qatysýshylarynyń rızashylyǵyna bólendi. Odan keıin jeńis jelpinisine jiger qosqan «Alashuly» men «Format» toptary shyrqaǵan ánder de jeńimpazdar forýmynyń kórigin qyzdyra tústi.
Ánshilerdiń asqaq áýenine arqalanǵan sátten keıin sahnaǵa «Nur Otan» partııasynyń Parlament Májilisiniń saılaý dodasynda jeńiske jetken jeńimpazdary, partııanyń saılaýaldy shtabynyń músheleri kóterildi.
Sahna tórindegi elge tanymal tulǵalardy alyp ekrannan kórsetken saıyn jınalǵan jurt bir dýyldasyp qalady. Ásirese, jastar jaǵy áıgili sportshylar Serik Sápıev, Ilıa Ilın, Aleksandr Vınokýrov pen ánshiler Qaırat Nurtas, Janar Doǵalovany kórgende yqylaspen qol soǵyp jatty.
Qazaqstan Respýblıkasynyń Prezıdenti, «Nur Otan» partııasynyń Tóraǵasy Nursultan Nazarbaevty jeńimpazdar forýmyna qatysýshylar aıryqsha qoshemetpen qarsy aldy. Memleket basshysy partııanyń qoldaýshylaryn jeńisimen quttyqtady. Nursultan Ábishuly óz sózinde qazirgideı alasapyran zamanda bizdiń elimizdegideı aýyzbirshilikti eshbir el, eshbir halyq kórsetip otyrmaǵandyǵana, qazaqstandyqtardyń basty ereksheligi de osynda ekendigine toqtaldy.
«Táýelsizdigimizdiń 25 jyldyq mereıtoıy qarsańynda 60 memleket pen Qazaqstannyń óz baıqaýshylary, sondaı-aq, 200-den astam BAQ ókilderi, dúnıejúziniń aqparat quraldarynyń ortalyqtary bizdiń saılaýymyzdy demokratııanyń shyńynda dep aıtty. Bul – bizdiń jetistigimiz. Qazaqstan budan bylaı óziniń shynaıy demokratııaly el ekenin, osyndaı ashyq, zańdy túrde saılaý ótkizetinin jáne kóppartııalyq bolatynyn búkil álemge dáleldedi. Mine, bizdiń jetistigimizdiń eń úlkeni osy», – dep atap ótti Memleket basshysy.
Elbasy keshegi ótken saılaýdyń orny bólek ekendigin, onyń eldiń bolashaq jeńisterine bastaý bolatyndyǵyn atap kórsetti.
«Saılaýǵa qatysý kórsetkishi 77 paıyzdan asty, qazaqstandyqtardyń 82 paıyzy «Nur Otan» partııasyna daýys berdi. Bul – elimiz úshin rekordtyq kórsetkish. Biz búkil álemge respýblıkamyzda ashyq, aıqyn ári ádil saılaý ótip jatqanyn, sonyń nátıjesinde Parlamentte kóppartııaly júıe jumys isteıtinin pash ettik. Saılaýdyń ótý barysyn jan-jaqty jazyp-jarııalap, álemdik qoǵamdastyqqa kórsetken sheteldik jáne qazaqstandyq buqaralyq aqparat quraldarynyń ókilderine alǵys aıtamyn. Bul – el Táýelsizdiginiń 25 jyldyǵynda qol jetken zor demokratııalyq jetistigimiz. Osyǵan baılanysty respýblıkalyq jáne óńirlik shtab múshelerine, árbir saılaýshyǵa saıasatymyzdy túsindirgen jáne jurtty birlik pen bolashaq tabystarǵa jigerlendirgen saılaý aldyndaǵy jumysqa qatysýshylardyń barlyǵyna alǵys bildiremin. Bizdiń ustanǵan baǵytymyzdy qoldaǵany úshin barlyq qazaqstandyqtarǵa rahmet. Biz birtutas ekenimizdi, kez kelgen qıyndyqty eńserip, Qazaqstandy gúldengen elge aınaldyra alatynymyzdy kórsettik», – dedi Memleket basshysy.
El Prezıdenti óz sózinde partııanyń qol jetkizgen jeńisiniń salmaqty jaýapkershiligi bar ekenine de toqtaldy. Nursultan Ábishulynyń: «Nur Otan» partııasynyń jeńisi – halqymyzdyń jeńisi. Saılaýda buryn-sońdy bolmaǵan belsendilik baıqaldy, 77 paıyzdan astam saılaýshy kelip, 82 paıyzy «Nur Otanǵa» daýys berdi. Bul degen – úlken qoldaý, senim, osy senimdi aqtaý úshin jumys isteýimiz kerek», – degeni osyny aıǵaqtaı túsedi.
Sondaı-aq, Nursultan Nazarbaev saılaýǵa belsene qatysyp, «Nur Otanǵa» qoldaý bildirgen jastarǵa alǵysyn bildire otyryp, olarǵa bataly tilegin bildirdi.
«Men bolashaq urpaqqa halqymyzdyń birligi men tutastyǵyn saqtaýdy amanattaımyn. Biz Qazaqstannyń ósip-órkendep, búkil álemde bedeldi bolýy úshin tynyshtyq pen kelisimniń negizin qaladyq. Osynyń bárin biz Qazaqstan jastary úshin jasap jatyrmyz», – deı kelip, Memleket basshysy jastarǵa memlekettiń táýelsizdigin nyǵaıtýǵa, eldiń birligin saqtaýǵa qyzmet etýi tıis degen amanatyn da arqalatty.
Sóziniń sońynda Memleket basshysy qazaqstandyqtardy Naýryz merekesimen quttyqtap, olarǵa baq-bereke tiledi.
Partııa Tóraǵasynyń birinshi orynbasary Asqar Myrzahmetov óz sózinde saılaýda «Nur Otannyń» Elbasynyń eńbegi men bedeliniń arqasynda jeńiske jetkendigine erekshe toqtaldy: «Bul jeńis – eń aldymen Elbasy saıasatynyń jeńisi, Elbasynyń jeńisi. Qazaqstandyqtar osy ýaqytqa deıin jetken jetistikterimizge oń baǵasyn berip, bolashaq úshin arnalǵan baǵdarlamalarǵa senetinin kórsetti. Birliktiń, turaqtylyqtyń, jasampazdyqtyń mańyzdy ekenin kórsetti. Endigi jerde,aldymyzda Ult Jospary, «Nurly Jol», basqa da strategııalyq qujattarǵa negizdelgen partııanyń jańa saılaýaldy baǵdarlamasyn oryndaý mindeti tur», – dedi A.Myrzahmetov.
Táýelsizdik qurdastary atynan, Pavlodar oblysy turǵyndary atynan, Qazaqstan halqy Assambleıasy jastar qanaty atynan Memleket basshysyn, nurotandyqtardy jarqyn jeńisimen quttyqtaǵan Pavlodar oblysy QHA jastar birlestikteri qaýymdastyǵynyń tóraıymy Elına Paýlı jeńis beıbitshilik pen kelisimniń arqasynda saltanat qurǵanyn aıtty. О́ziniń Memleket basshysynyń saıasatyna degen rızashylyǵyn bildirdi: «О́tken saılaý barlyq qazaqstandyqtardyń biraýyzdylyǵyn, HHI ǵasyrda eldi jan-jaqty jańǵyrtýǵa baǵyttalǵan Sizdiń baǵytyńyzdy qoldaıtyndyǵyn kezekti márte dáleldedi. Biz árqashanda Sizben birgemiz, «Nur Otanmen» birgemiz»,– dep túıindedi sózin Elına Paýlı.
«Sizdi jáne nurotandyqtardy jarqyn jeńisimen quttyqtaımyn. Búgingi jeńis búkil Qazaqstan halqynyń tańdaýy»,– dep bastady sózin L.N.Gýmılev atyndaǵy Eýrazııa ulttyq ýnıversıtetiniń rektory Erlan Sydyqov. Ári qaraı eldegi birlik pen yntymaqtyń uıytqysy Memleket basshysy ekendigin aıtty: «Búginde mıllıonnan astam adam soǵys jaǵdaıynda ómir súrip jatyr. Úıin tastap, otbasynan bezip, jan saýǵalap júrgender qanshama. Al bizde, beıbitshiliktiń besigine aınalǵan Qazaqstanda alańsyz, erkin ómir súrip jatyrmyz. Búgingi birligimiz, turaqtylyǵymyz jaıly ómirimiz ben jarqyn keleshegimiz úshin Sizge qaryzdarmyz. Uly Dalanyń uly muratyn – Ult Josparyn júzege asyrýǵa bar kúsh-jigerimizdi jumsaımyz. Al Máńgilik Eldiń myǵym irgetasyn Sizben birge, Sizdiń partııańyz – «Nur Otanmen» birge qalaımyz», – dep sózin túıindedi Erlan Sydyqov.
«Lokomotıv» AQ mashınısiniń kómekshisi Gennadıı Shıpovskıh barsha forýmǵa qatysýshylardy «Nur Otannyń» jarqyn jeńisimen quttyqtaı otyryp, sany 150 myńnan asatyn qazaqstandyq otbasy múshelerin qosqanda jalpy sany mıllıonǵa jetip jyǵylatyn jurttyń bári de «Nur Otandy» qoldap daýys bergendigin jetkizdi. «О́ıtkeni, onyń Tóraǵasy Sizsiz, Nursultan Ábishuly. Qazirgideı daǵdarys kezinde birqatar elderde óndiris turalap qaldy, jumys orny qysqaryp jatyr. Sizdiń arqańyzda biz bolashaqqa senimdimiz»,– dep qaıyrdy sózin Gennadıı Shıpovskıh.
Sóıtse, temirjolshylar ókiliniń qazaqsha sóz sóılegeni óz aldyna, jyr shýmaqtaryn da tógildirtedi eken. Árıne, tórt aıaǵy teń basqan demesek te, jeńimpazdar jıynynda oqylǵan óleń joldary adamnyń kókiregine kádimgideı jylylyq uıalatady.
Qadam basyp kelemin
Aldaǵy kúnge senimmen,
Bolashaǵym «Nur Otanmen» bólingen.
Jan-jaqqa jarııa etem men búgin:
Baqyttymyn Elbasymmen, elimmen!
Jeńimpazdar forýmy osylaısha Gennadıı Shıpovskıhtiń jyr joldarymen órnektelip, forým sońy merekelik konsertke ulasty.
Ǵabıt ISKENDERULY,
«Egemen Qazaqstan».
Sýretterdi túsirgender
S.BONDARENKO, B.OTARBAEV.
