Ońtústik Qazaqstan oblysynda ótken saılaý barysyna 13 sheteldik baıqaýshy qatysty. Onyń ishinde TMD tarapynan úsh baıqaýshy Qyrǵyzstannan, úsh baıqaýshy Reseı Federasııasynyń Iаroslav oblysynan keldi.
Avstrııadan kelgen Petter Anderson jýrnalıstermen kezdeskende bylaı dedi.
– Men sizdermen kezdesýge deıin jeti saılaý ýchaskesinde boldym. Qaı-qaısynda da adam kóp, bul saılaýdyń demokratııalyq jaǵdaıda ótip jatqandyǵynyń belgisi. Bul meniń Qazaqstanǵa ekinshi saparym. Munyń aldynda Prezıdent saılaýynda baıqaýshy bolyp qatysqanmyn. Saılaý barysynda zańbuzýshylyq oqıǵalary oryn alǵan joq. Úmitkerlerdiń baqylaýshylary tarapynan da aryz-shaǵym bolmady. Saılaý ýchaskelerine kóp azamattar kelip, óz tańdaýyn jasady. Olardyń aqjarqyn júzinen ómirge degen qushtarlyq, memleketiniń bolashaǵy myqty bolaryna senimdilik ańǵarylady.
Al, Fransııadan kelgen baıqaýshy, senator Iv Posso Dı Borgo shymkenttik saılaýshylardyń kezekke turǵysy kelmeı tez daýys berý úshin asyǵatyndaryna tańdanysyn bildirdi.
Onyń aıtýynsha Fransııada saılaýshylar saılaý ýchaskelerinde óz kezegin asyqpaı tosady.
– Ońtústikqazaqstandyqtardyń óz daýysyn berý úshin kezek kútpeıtindiginde turǵan eshqandaı zań buzýshylyq joq, – deıdi fransııalyq baıqaýshy.
– Saılaýshylar óte belsendi, kóńildi. Ásirese, jastardyń jarqyly erekshe tańǵaldyrdy. Olar ómirdiń búgingisinen de jaqsarǵanyn qalaıdy. Qazaqstanda ózge Ortalyq Azııa memleketterine qaraǵanda qaı jaǵynan alǵanda da alǵa basýshylyq bar.
Shetelden kelgen baıqaýshylar tek saılaý ýchaskelerindegi jaǵdaıǵa ǵana emes Qazaqstannyń bolashaǵyna da jaqsy baǵa berýde.
Baqtııar TAIJAN,
«Egemen Qazaqstan».
Ońtústik Qazaqstan oblysy.
