Uıymdastyrý deńgeıi joǵary

Keshe Ortalyq saılaý komıssııasynda TMD baıqaýshylar mıssııasynyń ókilderi Qazaqstandaǵy Parlament Májilisiniń depýtattaryn saılaý barysy týraly tilshilermen kezdesý ótkizdi. Bul rette TMD baıqaýshylar mıssııasynyń basshysy Sergeı Lebedev TMD baıqaýshylarynyń atynan málimdeme jasady. Biz búgingi ýaqytta Qazaqstanǵa kórshi retinde, sonymen qatar, dostyq qarym-qatynasy berik ornaǵan jaqyny retinde kelip otyrmyz. Bizder bir-birimizge jaqsy dos bolyp qala beremiz, dep bastady sózin Sergeı Lebedev jıyn barysynda. Sony­men qatar, ol men batystyq baıqaý­shy­­larmen pikirleskenimde, olar­­ǵa: «Áriptester, bizder bir-biri­mizdi jaqyn ári jaqsy biletin bol­ǵandyqtan, mundaǵy saılaý barysyn kóbirek qadaǵalaımyz ári kóremiz», deımin. Eger de qandaı da bir olqylyqtar oryn alyp jatsa, dostyq baılanys arqyly ol máseleniń sheshý joldaryn qarastyramyz», dedi. Sondaı-aq, saılaý barysyna naqtyraq toqtalǵan TMD baı­qaýshylar mıssııasynyń basshysy saılaýdyń tolyqtaı zań aıasynda ótkendigin jetkizdi. Jáne de ha­lyqaralyq normalarǵa saı dep tanýǵa bolatynyn aıtty. Bul rette, baıqaýshylar saı­laý­­shy­lardyń daýys berý bary­syn tolyqqandy ári júıeli baqylaı alǵandyǵyn kóldeneń tartty. Belgili bolǵandaı, TMD baıqaýshylar mıssııasy 26 aqpannan beri saılaýaldy daıyndyq jumystaryn jiti baqylaǵan. Bir aıǵa jýyq ýaqyt ishinde saılaýǵa daıyndyq pen saılaý barysyn egjeı-tegjeıli qadaǵalaǵan baıqaýshylar, res­pýblıkanyń barlyq aımaq­tarynda bolypty. «TMD baıqaýshylar mıs­sııasynyń quramynda 301 adam bar. Eshqandaı kedergiler men kemshilikter kezdesken joq. Jyl­dan-jylǵa saılaýdy uıym­das­tyrý jaǵy damyp, kóterilip kele jatqanyn baıqadyq. Ýa­qyt ót­ken saıyn saılaýdy uıym­­­das­tyrýshylar arasynda jas­­­tar­dyń kóptep kezdesetini tańǵal­dyrady», dedi S.Lebedev. Sonymen qatar, ol ózge mem­leketter arasynda bizderdi saı­laý jumystaryna úıretkisi keletin­der bar ekenin, kerisinshe saılaý­dy uıymdastyrý barysyn olardyń bizden úırenýi qajettigin aıtty. Osy oraıda, bul saılaýdyń ót­ken saılaýlarǵa qaraǵanda nesi­men erekshe bolǵanyn ataı kele, uıymdastyrýshylyq pen jurt­­shylyqtyń saılaý týra­ly mádenıetiniń joǵary bol­ǵan­dyǵyn tilge tıek etti. Jáne de mundaı pikirdi tek qana TMD baıqaýshylary ustanyp otyrǵan joq, Batys baıqaýshylarynyń oıy da osy bolǵandyǵy aıtyldy. Saılaýdyń joǵary deńgeıi men ýchaskelerdiń jaqsy bezendirilgeni, ýchaskelerdiń kópshiligi iri ǵıma­rattarda: JOO, mektepter, máde­nıet úıleri men memlekettik meke­melerde ornalasqandyǵy atalyp ótildi. Jáne de saılaýdyń teń báse­kelestik deńgeıinde, ádil ári ashyq ótkeni aıtyldy. Barlyq oblystarda TMD baıqaýshylar mıssııasy bas-aıaǵy 2875 saılaý ýchaskelerinde bolǵan. Sergeı Lebedev keshegi saılaýda halyqtyń óz tańdaýyn jasaǵanyn, endigide jańa Parlamenttiń memlekettiń damýy men turaqtylyǵy jolynda jańa belesterdi baǵyndyraryna senimin bildirdi. Elmıra MÁTIBAEVA, «Egemen Qazaqstan».