Azııalyq forým jumysyna qatysty

Qazaqstan Respýblıkasy Premer-Mınıstriniń birinshi orynbasary Baqytjan Saǵyntaev Qytaı Halyq Respýblıkasynyń Haınan provınsııasyndaǵy Boao qalasynda ótken Boao azııalyq forýmynyń 15-shi sessııasyna qatysty, dep habarlady Premer-Mınıstrdiń baspasóz qyzmeti. О́z sózinde B.Saǵyntaev bıyl­ǵy jyly «Azııanyń jańa bolashaǵy: Jańa dınamıka, Jańa kózqaras» taqyrybynda ótip jatqan Boao azııalyq forýmy sýbkontınenttegi ózara is-qımyldardy tereńdetýge jáne álemdik ekonomıkany saýyqtyrý joldaryn izdeýge eleýli úles qosady, dep atap kórsetti. Azııa jahandyq halyqaralyq qarym-qatynastardyń basty alańyna aınalýda, al Qazaqstan óziniń aıryqsha geografııalyq jaǵdaıyn paıdalana otyryp, Eýropa men Azııa arasynda tran­zıttik kópir rólin atqarýǵa daıyn, dep atap ótti birinshi Vıse-premer. Onyń pikirinshe, bul turǵyda Qazaqstan Prezıdenti Nursultan Nazarbaev jarııalaǵan «Nurly Jol» Jańa Ekonomıkalyq Saıasatynyń QHR Tóraǵasy Sı Szınpın usynǵan «Bir beldeý, bir jol» bastamasymen astasý úderisi qazirgi zamanǵa saı qadam bolyp tabylady. Ol yntymaqtastyqty nyǵaıtýǵa jáne ejelgi Uly Jibek joly áleýetin qaıta órkendetý jolymen óńir elderiniń áleýetin ashýǵa jaǵdaı jasaıdy. Onyń syrtynda BAF-qa qatysý sheńberinde Baqytjan Saǵyntaev QHR Memlekettik keńesiniń premeri Lı Kesıanmen, Azııa ınfraqurylymdyq ınves­tısııalar bankiniń prezıdenti Szın Lısıýnmen, CITIC Construction kompanııasy dırektorlar keńesiniń tóraǵasy Hýn Bomen, Shensı provınsııasynyń gýbernatory Loý Sınszıanmen kezdesýler ótkizdi. Kelissózder barysynda Qazaqstan men Qytaı arasyndaǵy jan-jaqty strategııalyq áriptestikti damytý jónindegi sharalar talqylandy.