Dostyq dastarqany

jaıylyp, tatýlyq pen birliktiń bastaýyna aınalǵan Ulystyń uly kúni ózgeshe keıipte atap ótildi Aqtyń molaıatyn, tirshiliktiń jańaratyn, kóńildiń keńıtin, bereke men birlikke, tazalyq pen meıirimdilikke, shattyq pen qýa­nyshqa jeteleıtin áz Naýryz merekesine Táýelsizdigimizdiń shırek ǵasyrdaǵy jarqyn belesteri men jasam­pazdyqtyń jarqyn joldary arqaý etildi. Jyl basyn toılaýǵa arnalǵan keshendi jospar sheńberinde 350-den astam qoǵamdyq-mádenı sharalar qamtylyp, «Qosh keldiń, mereıli Naýryz!» teatrlandyrylǵan-ho­reografııalyq qoıylymmen bas­taldy. Onyń sońy kópshiliktiń qosylýymen «Qara jorǵa» bıine ulasty. Jınalǵandar nazaryna «Segiz Seri», «Sladkaıa ıagoda», «Esil áýenderi», «Slavıanka», «Qy­zyl­jar», «Balqadısha» sekil­di óńirge tanymal halyqtyq, folklorlyq ansamblder men vokaldyq toptardyń konserttik baǵdarlamasy usynyldy. Soltústikqazaqstandyqtarǵa arnaǵan qut­tyq­­taý sózinde aımaq basshysy Erik Sulta­nov barsha jurtty tabıǵattyń qaıta túleýi men jańarýynyń tamasha mezgilimen quttyqtap, kók­temdeı kógildir kóńil, keń rııasyz ómir tiledi. «Dostyq» úıi aldynda etno­mádenı birles­tikterdiń daıyndaýymen uzyndyǵy 25 metrlik «Dostyq» dastarqany jaıylyp, Naý­ryz kóje, ulttyq taǵamdar taratyldy. Ortalyq alańda «Baýyrsaq-fest» aksııasy, kıimder defılesi, otbasylyq oıyn-saýyqtar, sport­tyq jarystar, etnoaýyl men qol­óner buıymdary kórmesi, ádet-ǵuryp, salt-dástúr rásimderi uıym­dasty­rylyp, ulttyq qundylyqtar barynsha nasıhattaldy. «Jaraısyńdar, ájeler!» baı­qaýynda Al­fera Abdrahıeva birinshi oryndy jeńip alsa, Aqmola, Qaraǵandy, Pavlodar, Soltústik Qa­zaqstan oblystarynan 12 aqyn qatysqan aı­maqaralyq sóz saıysynda petropavldyq Jar­qyn Juparhan top jardy. Aqshańqan kıiz úıler konkýrsynda gran-prı Aıyrtaý aýdanyna buıyrdy. Al memlekettik mekemeler arasynda oblystyq ishki ister departamentiniń mereıi ústem boldy. Osy kúni birqatar áleýmettik nysandar ashylyp, paıdalanýǵa berildi. Qyzyljar óńirinde úsh kún boıy toılanǵan Ulystyń uly kúninde adamdar bir-birine Otannyń tynyshtyǵyn, eldiń amandyǵyn tilep, aýa raıynyń jylýyn jaqsylyqqa jorydy. О́mir ESQALI, «Egemen Qazaqstan». Soltústik Qazaqstan oblysy.