Atyraý oblysynyń ákimi taǵaıyndaldy

ATYRAÝ. 26 naýryz. Búgin Qazaqstan Respýblıkasynyń Prezıdenti Nursultan Nazarbaevtyń Jarlyǵymen Atyraý oblysynyń ákimi bolyp Nurlan Noǵaev taǵaıyndaldy. Bul týraly egemen.kz tilshisi habarlady. Premer-Mınıstr Kárim Másimov pen Qazaqstan Prezıdenti Ákimshiliginiń jetekshisi Nurlan Nyǵmatýllın oblys aktıvine aımaqtyń jańa basshysyn tanystyrdy. Munyń aldynda Úkimet basshysy jańa ákimniń kandıdatýrasyn oblystyq máslıhat depýtattarynyń talqysyna usyndy. Depýtattar óz kezeginde Nurlan Noǵaevtyń kandıdatýrasyn tolyq qoldap, biraýyzdan daýys berdi. Oblys aktıvimen kezdesýde Kárim Másimov oblysty 4 jylǵa jýyq basqarǵan Baqtyqoja Izmuhambetovtiń jańadan jumysyn bastaǵan VI shaqyrylymdaǵy Parlament Májilisiniń tóraǵalyǵyna saılanǵanyn habardar etti. Osyǵan baılanysty Elbasynyń otandyq ekonomıka úshin strategııalyq mańyzy aıryqsha zor oblys basqarý jónindegi tańdaýy  Nurlan Noǵaevqa túskenin atap ótti. Jıynda Baqtyqoja Izmuhambetov te, Nurlan Noǵaev ta Memleket basshysyna senim kórsetkeni úshin alǵys bildirip, aldaǵy ýaqytta da el múddesi úshin eńbek ete beretinderin jetkizdi. Aıta keteıik, Nurlan Noǵaev buǵan deıin Batys Qazaqstan oblysynyń ákimi bolǵan. Joldasbek Shópeǵul. Derek: egemen.kz. Foto: oraloniri.kz.